ᐊᕐᕌᒍᓂᑦ ᐊᒥᓱᒐᓚᓐᓂᑦ, ᐱᔭᕆᐊᑐᔫᖃᑦᑕᓯᒪᓕᕐᑐᖅ ᐅᑭᐅᕐᑕᑐᒥ ᐱᒍᑦᔨᕕᐅᔪᓄᑦ ᑲᔪᓯᓕᕐᑎᑕᐅᓂᖓ ᑯᐸᐃᒃ ᐱᖁᔭᖏᑦ ᐊᒥᐊᒃᑯᕕᓂᕐᓂᑦ ᐊᑦᑕᓇᕐᑐᓂᑦ ᐱᖁᑎᓄᓕᖓᔪᓂᑦ ᓄᓇᕕᒻᒥ. ᓄᓇᕕᐅᑉ ᓄᓇᓕᖏᑦ ᖁᓕᓪᓗ ᓯᑕᒪᓪᓗᐃᑦ ᑖᒃᑯᑑᑦᓱᑎᑦ 12,000 ᑕᓐ-ᓂᑦ ᐅᖁᒪᐃᓐᓂᓕᓐᓂᑦ, ᐅᕝᕙᓗᓐᓃᑦ 122,000 ᒥᑕᐅᑦᓱᑎᑦ ᓯᒃᑭᑕᓪᓗᐊᓂᑦ, ᐊᒥᐊᒃᑯᕕᓂᕐᓂᑦ ᐱᖁᑎᓖᑦ ᖃᓄᐃᓘᕈᑎᐅᒋᐊᓪᓚᕆᐊᖃᕐᖁᑦ ᐅᑎᕐᑎᑕᐅᓂᐊᕐᒪᑕ ᑖᒃᑯᐊ ᐱᖁᑏᑦ ᓈᒻᒪᓈᑦᓯᐊᑐᑎᒍᓪᓗ ᐊᐅᓚᑕᐅᓗᑎᑦ ᐊᑦᑕᓇᕐᑐᐃᑦ ᐱᖁᑏᑦ.

ᑲᕙᒪᐅᑉ ᐃᑲᔪᕐᓯᒍᑎᒋᓲᖏᑦ ᐊᒥᐊᒃᑯᕕᓂᕐᓂᑦ ᐊᑦᑕᓇᕐᑐᓂᑦ ᐱᖁᑎᓂᑦ ᓄᓇᕕᒻᒧᓕᖓᖕᖏᒪᑦ, ᑲᑎᕕᒃ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐊᕐᕌᒍᓂᑦ ᐊᒥᓱᓂᑦ ᐃᑲᔪᕐᓯᓯᒪᓕᕐᖁᑦ ᐃᓚᐅᑦᓱᑎᓗ ᓄᓇᓕᓐᓄᑦ, ᓄᓇᓕᓕᒫᓂᓗ ᑯᐸᐃᒃᓕᒫᑎᒍᓪᓗ ᐃᑲᔪᕐᓯᒍᑎᐅᔪᓂᑦ ᖃᐅᔨᒪᔭᐅᑎᑦᓯᒐᓱᒍᑎᓂᑦ ᓄᓇᖁᑎᖓᓂ ᐊᕙᑎᓕᕆᓂᕐᒧᓗᐊᖕᖑᐊᖅ ᐃᓕᖓᔪᓂᑦ.

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑉᐱᒋᔭᖃᓲᖑᕗᑦ ᐱᕙᓪᓕᐊᓂᖏᓐᓂᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ 2010ᒥᓂᑦ ᐱᓇᓱᐊᕐᑕᖏᓐᓂᑦ ᑲᔪᓯᓕᕐᑎᓯᑦᓱᑎᑦ ᓄᓇᕕᒻᒥ ᐊᒥᐊᒃᑯᕕᓂᕐᓂᑦ ᐊᑦᑕᓇᕐᑐᓂᑦ ᐊᐅᓚᑕᐅᓂᑦᓴᖏᓐᓂᑦ ᐊᑐᐃᓐᓇᕈᕐᑎᓂᑎᒍᑦ. ᐊᑐᐃᓐᓇᕈᕐᑎᕙᓪᓕᐊᓯᔪᕕᓃᑦ ᐅᑭᐅᕐᑕᑐᒥ ᓄᓇᓖᑦ ᑭᖕᖑᒪᑦᓯᓂᖏᓐᓄᑦ ᐊᕙᑎᐅᑉ ᓴᐳᒻᒥᔭᐅᒋᐊᖃᕐᓂᖓᓄᓕᖓᔪᓂᑦ. ᐊᑐᐃᓐᓇᕈᕐᑎᑕᐅᒪᔪᖅ ᕿᒥᕐᕈᓂᐅᕗᖅ ᖃᓄᐃᓕᖓᒋᐊᖁᔨᒍᑎᐅᑦᓱᓂᓗ ᐃᑭᓪᓕᐅᒥᑎᑦᓯᓗᑎᑦ, ᐊᑐᕆᐊᓪᓚᓗᑎᑦ, ᐅᑎᕐᑎᓯᓗᑎᓗ ᐱᖁᑎᓂᑦ ᓈᒻᒪᓈᑦᓯᐊᑐᑎᒍᑦ ᓄᓇᕕᒻᒧᑦ.

ᓇᐃᓪᓕᑎᕐᓯᒪᔪᖅ ᓄᐃᑦᓯᒋᐊᖕᖓᐅᑎᒃ ᓄᓇᕕᐅᑉ ᐃᐱᕃᓐᓇᑕᐅᒪᔪᓂᑦ ᐱᖁᑎᓂᑦ ᐊᐅᓚᑕᐅᓂᖏᑦᑕ ᐊᑐᐃᓐᓇᕈᕐᑎᑕᐅᓂᖏᑦ (ᐆᑦᑐᐱᕆ 2013)

ᒫᓐᓇᖃᒻᒥᑯᑦ, ᐊᓪᓚᑕᐅᒪᒍᑎᖏᑦ ᐊᕙᑎᓕᕆᓂᕐᒧᑦ ᐃᒫᙰᕐᑏᑦ ᐃᓕᓐᓂᐊᕕᕐᔪᐊᖓᓂ ᑯᐯᒃ ᓯᑯᑎᒦᒥ ᑎᓕᔭᐅᓐᓂᖁᑦ ᑐᕐᖃᑕᕐᕕᖓᓄᑦ ᑖᕗᖓᐅᓕᒍᓐᓇᑐᓂᑦ ᐊᕙᑎᒥᒃ, ᐊᒻᒪᓗ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ ᐃᑯᓪᓚᑎᑦᓯᒐᓱᓐᓂᒧᑦ ᖃᐅᔨᓴᖁᔨᑦᓱᑎᑦ ᖃᐅᔨᓴᕐᓂᒥ ᐃᓚᑰᒍᑎᐅᔪᓂᑦ ᑐᑭᓯᒪᒍᑎᐅᓂᐊᕐᑐᓂᑦ ᓇᓗᓀᕐᓯᒍᑎᐅᓗᑎᓗ ᑖᒃᑯᓄᖓᓄᓕᖓᔪᓂᑦ ᐃᓚᖓᓂᓗ ᓄᑖᓂᑦ ᖃᓄᕐᑑᕈᑎᑦᓴᓕᐅᒍᓐᓇᓗᑎᑦ ᐃᑲᔪᕐᓯᓂᐊᕐᑐᓂᑦ ᓄᓇᓕᓐᓂᑦ ᓄᓇᓕᓕᒫᓄᓕᖓᔪᓂᓗ ᐊᕙᑎᓕᕆᓂᕐᒥ ᐱᓇᓱᑦᑎᓂᑦ ᐱᐅᓯᐅᒦᒋᐊᕐᑎᓗᒋᑦ ᖃᓄᐃᓗᕈᓯᒋᓲᒥᓂᒃ ᓴᓃᑦ ᐱᖁᑏᑦ ᐊᐅᓚᑕᐅᓂᕆᓲᖏᓐᓂᑦ. ᖃᐅᔨᓴᕐᓂᒥ ᐱᓇᓱᐊᕐᑕᐅᔪᕕᓂᕐᒥ, ᐊᓪᓚᓯᒪᔪ ᑌᔭᐅᔪᖅ Gestion des matières résiduelles en milieu nordique (ᐊᐅᓚᑕᐅᓂᖏᑦ ᓴᓃᑦ ᐱᖁᑏᑦ ᐅᑭᐅᕐᑕᑑᑉ ᐊᕙᑎᖓᓂ) ᓇᐅᓕᒫᓄᑦ ᑐᓴᕐᑎᓯᒍᑎᐅᓐᓂᖁᖅ ᐅᑦᑑᐱᕆ 2017ᒥ. ᒫᑦᔨ 2018ᒥ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐊᓪᓚᓂᕐᖁᑦ ᑐᕐᖃᑕᕐᕕᖓᓄᑦ ᑖᕗᖓᐅᓕᒍᓐᓇᑐᓂᑦ, ᐊᕙᑎᒥᒃ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ ᐃᑯᓪᓚᑎᑦᓯᒐᓱᓐᓂᒧᑦ ᓯᕗᓪᓕᐅᔭᐅᖁᔨᑦᓱᑎᑦ ᐱᓀᓗᑕᐅᔪᓂᑦ ᐊᓪᓚᑕᐅᒪᒍᑎᖏᓐᓃᑐᓂᑦ.

ᐃᓚᐅᒻᒥᔪᖅ, ᐱᓇᓱᖃᑎᒌᑦᑐᓕᐅᕐᓂᖁᑦ ᐱᓇᓱᐊᕐᓂᐊᑐᓂᑦ ᓴᓃᑦ ᐱᖁᑏᑦ ᐊᐅᓚᑕᐅᓂᖏᓐᓂᑦ ᓄᓇᕕᒻᒥ, ᑲᑎᖕᖓᒋᐊᕐᑐᖁᔭᕕᓂᐅᑦᓱᑎᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑲᑎᖕᖓᔪᓅᕐᓂᖁᑦ ᐁᕆᓕ 2018ᒥ.

ᐊᑯᓐᓂᖏᓐᓂᑦ 2011-2013, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᓄᓇᓕᓐᓂ, ᑎᒥᐅᔪᓂᑦ, ᓇᒻᒥᓂᕆᔭᐅᔪᐃᓪᓗ ᑭᒡᒐᑐᕐᑎᖏᓐᓂᑦ ᑭᓇᓕᒫᒃᑯᓄᓗ ᑐᓂᔨᖃᑦᑕᓂᕐᖁᑦ ᐱᖓᓱᓂᑦ ᐊᑦᔨᒌᖕᖏᑐᓂᑦ ᑐᑭᓯᑎᑦᓯᒍᑎᓂᑦ ᖃᓄᖅ ᐊᐅᓚᑕᐅᔪᑦᓴᐅᒪᖔᑕ ᐊᒥᐊᒃᑯᕕᓃᑦ ᐊᑦᑕᓇᕐᑐᐃᑦ ᐱᖁᑏᑦ ᓄᓇᕕᒻᒥ, ᐊᑭᓐᓇᒥᐅᑕᓕᐅᕐᓱᑎᓗ ᓇᐃᓪᓕᑎᕐᓯᒪᔪᓂᑦ ᑐᑭᓯᓇᕈᑎᓕᓐᓂᑦ. ᑐᑭᓯᒪᓕᐅᒥᖁᑦᓱᒋᑦ ᑭᓇᓕᒫᒃᑯᑦ ᐊᑦᑕᓇᕐᑐᓂᑦ ᐃᓪᓗᒥᐅᑕᓂᑦ, ᓂᓪᓕᓇᕐᑐᑯᕕᒻᒥ ᓂᕕᖓᓲᑦ ᓴᓇᔭᐅᓐᓂᖁᑦ ᓄᐃᑕᑎᑦᓯᔪᑦ ᑐᑭᓯᓇᕐᑎᓯᒍᑎᒥᒃ ᑭᓇᓕᒫᒃᑯᓅᓕᖓᔪᒥᒃ. ᐅᓇᓗᑦᑕᐅᖅ, ᑐᑭᓯᓇᕐᑎᓯᒍᑎᐅᑦᓱᓂ ᑐᓴᕋᕐᓴᓕᐊᖑᓐᓂᒥᔪᖅ ᓈᓚᐅᑎᖓᓂ ᓄᓇᓕᓕᒫᓄᑦ ᑐᓵᔭᐅᓱᑎᒍᑦ.

ᐊᒥᐊᒃᑯᕕᓂᕐᓂᑦ ᐊᑦᑕᓇᕐᑐᓂᑦ ᐱᖁᑎᓂᑦ ᐊᐅᓚᑕᐅᓂᑦᓴᖏᑦᑕ ᑐᑭᓯᓇᕐᑎᓯᒍᑎᖏᑦ ᓄᓇᕕᒻᒧᓕᖓᔪᑦ ᓄᓇᓕᐊᕈᕐᓄᑦ ᓄᓇᓕᓕᒫᒥᓗ ᑎᒥᐅᔪᓄᑦ

ᐊᑦᓇᑕᕐᑐᐃᑦ ᐱᖁᑏᑦ ᐊᐅᓚᑕᐅᓂᑦᓴᖏᑦᑕ ᑐᑭᓯᓇᕐᑎᓯᒍᑏᑦ ᓄᓇᕕᒻᒥᐅᓄᓕᖓᔪᖅ

ᑯᕕᔪᖃᕐᐸᑦ ᖃᓄᐃᓘᕈᓯᐅᒋᐊᓖᑦ ᐊᒻᒪᓗ ᓱᒃᑯᓇᕐᑐᑕᓖᑦ ᓄᓇᐃᑦ ᓴᓗᒻᒪᓴᕐᑕᐅᓂᖏᑦᑕ ᑐᑭᓯᓇᕐᑎᓯᒍᑎᖏᑦ ᓄᓇᕕᒻᒥ ᓄᓇᓕᐊᕈᕐᓄᑦ ᓄᓇᓕᓕᒫᓂᓗ ᑎᒥᐅᔪᓄᑦ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑲᔪᕐᓯᓯᒪᓕᕐᖁᑦ ᐱᖓᔪᒋᓕᕐᑕᖓᓂᒃ ᒥᑦ-ᑲᓇᑕ ᓚᐃᓐ ᓴᓗᒻᒪᓴᐃᓂᖏᓐᓂᑦ. ᑭᓪᓕᓕᒫᖓᓂ ᖃᐅᔨᓴᕈᑎᑕᓖᑦ ᑕᑉᓗᓂᑦ ᖃᐅᔨᓴᕈᑏᓪᓗ ᑲᓇᑕᓕᒫᒥ ᐃᑳᕐᑐᐃᑦ 55 ᐃᑰᑕᖓᓃᑦᓱᑎᑦ. 16,000 ᐅᖓᑖᓂᑦᑐᑦ ᖃᑦᑕᐅᔭᐃᑦ ᓄᓇᖏᓐᓃᖏᓐᓇᖁᑦ, ᑭᑭᐊᑦᓴᔭᕕᓃᑦ ᐊᒻᒪᓗ ᐃᓪᓗᒐᓴᐃᑦ. ᓄᓇᓖᑦ ᐱᐅᓯᕕᓂᖓᓄᑦ ᓄᓇᐅᑉ ᐅᑎᖁᔨᔪᐃᑦ ᓄᓇᓂᑦ ᐃᐱᕃᓐᓇᐃᕕᐅᓚᐅᕐᑐᕕᓂᕐᓂᑦ. – ᓇᐃᓪᓕᑎᕐᓯᒪᑦᓱᑎᑦ ᑐᑭᓯᓇᕐᑎᓯᒍᑏᑦ ᐱᐅᓯᕆᓯᒪᔭᒥᓄᑦ ᐅᑎᕐᑎᑕᕕᓃᑦ ᒥᑦ-ᑲᓇᑕ ᓚᐃᓐ ᓄᓇᓂ ᓄᓇᕕᒻᒥ (ᒪᐃ 2012) ᑐᑭᓯᒋᐊᕐᕕᕕᓂᖅ:

ᕿᒥᕐᕈᓂᖅ ᑲᓇᑕᐅᑉ ᕿᑎᕐᕋᖓᓂ ᐅᑎᕐᑎᕋᓱᐊᕐᓂᒥᒃ ᓄᓇᕕᐅᑉ ᐃᓂᒋᔭᖏᓐᓂ (ᒣ 2012)

ᑖᕗᖓᐅᓕᒋᐊᓪᓚᑐᖅ ᐱᓇᓱᐊᕐᑑᑉ ᑲᒪᒋᔭᑦᓴᖃᕐᓂᖓ

ᒪᓕᖓᖏᑦ ᐃᓕᖓᔪᑦ ᐅᑎᕐᑎᓯᓂᖅ ᐊᒻᒪᓗ ᐱᐅᓯᕕᓂᕐᒥᓄᕐᑎᓯᓂᖅ ᐱᖁᑎᓂᑦ ᒪᑭᑕᒐᓱᐊᕈᑎᓄᑦ ᑲᔪᓯᓕᕐᑎᑕᐅᓐᓂᖁᖅ ᑲᕙᒪᖓᓄᑦ ᑯᐯᒃ ᔪᓓ 2011. ᒪᓕᖓᖏᑦ ᑐᕌᒐᓖᑦ ᐃᑭᓕᐅᒥᑎᑦᓯᒐᓱᓪᓗᑎᑦ ᐅᓄᕐᓂᖏᓐᓂᑦ ᐊᒥᐊᒃᑯᕕᓂᕐᓂᑦ ᐱᖁᑎᓂᑦ ᓴᓂᒃᑯᕕᒻᒨᑕᐅᔪᓂᑦ ᐊᒻᒪᓗ ᒪᑭᑕᒐᓱᐊᕈᑏᑦ ᐊᒻᒪᓗ ᓱᓇᔪᐃᑦ ᑲᒪᒋᔭᑦᓴᓖᑦ ᐅᑎᕐᑎᓯᓂᖅ ᐊᒻᒪᓗ ᐱᐅᓯᕕᓂᕐᒥᓄᕐᑎᓯᓂᖅ ᐱᖁᑎᓂᑦ ᓂᐅᕕᐊᑦᓴᒥᓂᑦ ᑯᐯᒃᒥ, ᐃᓚᐅᑎᓪᓗᒋᑦ ᖃᕆᑕᐅᔭᑦᓴᔦᑦ, ᒥᖑᐊᕈᑏᑦ, ᐃᑯᒪᐅᑎᕕᓃᑦ ᐸᓂᕐᑐᐃᑦ, ᖃᐅᒪᔪᐹᓗᐃᑦ ᐳᓪᓓᑦ ᐊᒻᒪᓗ ᓱᓪᓗᓖᑦ ᐅᕐᓱᕈᑎᕕᓃᓪᓗ ᐊᑐᕐᓯᒪᔪᑦ, ᖁᐊᕆᒃᑯᑏᑦ, ᒥᖑᐊᕈᑎᓂᑦ ᐱᔦᒍᑏᑦ ᐊᒻᒪᓗ ᐅᕐᓱᕈᑎᒥᒃ ᓴᓗᒻᒪᓭᒍᑏᑦ. 2014ᒥᓂᑦ ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᖃᐅᔨᒪᑎᑕᐅᑦᓯᐊᖃᑦᑕᓂᕐᖁᑦ ᐅᑦᑐᕋᐅᑎᐅᔪᓂᑦ ᐱᓇᓱᐊᕐᑕᐅᔪᓂᑦ ᐊᒻᒪᓗ ᓄᐊᑦᓯᓂᐅᔪᓂᑦ ᓱᓇᑐᐃᓐᓇᓂᑦ ᓄᓇᕕᒻᒥ ᓄᓇᓕᖏᓐᓂᑦ ᒪᓕᑦᑐᓂᑦ ᒪᓕᒐᕐᓂᑦ.

ᐅᓗᒥᓇᒻ ᖁᒻᒧᔪᐃᑦ ᐊᑐᕆᐊᓪᓚᑐᑦᓭᑦ ᐅᑎᕐᑎᑕᐅᓂᖏᑦ

ᐊᑐᕐᑐᓴᓕᐅᕆᐊᓪᓛᓂᖅ ᓄᓇᕕᒻᒥ ᐊᑯᓂᓂᐋᓗᒃ ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᓐᓄᑦ ᐱᒻᒪᕆᖁᑎᒋᕙᐅᒃ. 2008ᖑᑎᓪᓗᒍ 2018ᒥᓗ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑮᓇᐅᔭᖃᕐᑎᓯᓐᓂᖁᑦ ᓄᐃᑕᐅᓂᖓᓂᒃ, ᐱᓇᓱᐊᕐᑕᐅᓂᖓᓂᒃ ᐁᑦᑐᑑᑎᐅᓂᖏᓐᓂᓗ ᐊᑭᓐᓇᒥᐅᑌᑦ ᑐᑭᓯᒪᔭᐅᑎᑦᓯᓕᐅᒥᒐᓱᑦᑐᑦ ᐱᐅᔫᒍᑎᖏᓐᓂᑦ ᐊᑐᕐᑐᓴᓕᐅᕆᐊᓪᓛᓂᖅ ᓄᓇᕕᒻᒥ. ᑖᒃᑯᐊ ᐊᑭᓐᓇᒥᐅᑌᑦ ᐁᑦᑐᑑᑎᐅᓐᓂᖁᑦ ᓄᐃᑕᑎᑕᐅᓛᕐᓱᑎᓗ ᓇᐅᓕᒫᓄᑦ ᐅᐸᑦᑕᐅᓲᓂ ᐃᓂᓂ ᖁᓕᓪᓗ ᓯᑕᒪᓪᓗᓂ ᓄᓇᓕᓐᓂ. ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐅᖄᖃᑎᖃᖃᑦᑕᖏᓐᓇᖁᑦ RECYC-QUÉBEC-ᑯᓂᑦ, Boissons Gazeuses Environnement ᐊᒻᒪᓗ ᓄᓇᕕᒻᒥ ᓂᐅᕕᕐᓂᐊᕕᓐᓂᑦ ᐱᑦᔪᑎᒋᑦᓱᒍ ᐊᓗᒥᓇᒻ ᖁᒻᒧᔪᓂᑦ ᐊᑐᕐᑐᓴᓕᐅᕆᐊᓪᓛᓂᕐᒧᑦ ᓄᓇᖁᑎᖓᓂ ᐃᓚᐅᒻᒥᑎᓗᒍ ᐱᖁᔭᑎᒍᑦ ᒪᓕᒋᐊᓕᖏᓐᓂᑦ ᖁᒻᒧᔪᐃᑦ ᐅᑎᕐᑎᑕᐅᑉᐸᑕ ᐊᑭᕕᓂᖏᓐᓂᑦ ᐊᑭᓖᒋᐊᖃᕐᓂᖏᓐᓂᑦ ᓄᓇᕕᒻᒥ ᓂᐅᕕᕐᓂᐊᕕᐅᔪᑦ.

ᐊᑕᐅᓯᐊᕐᓱᑎᑦ–ᐊᑐᕐᑕᐅᒉᑦ ᕿᓪᓕᑐᔦᑦ ᐴᑦ

2008ᒥ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑲᔪᕐᓯᓂᕐᖁᑦ ᐅᑭᐅᕐᑕᑐᒥ ᓄᓇᓕᖓᓂᒃ ᑰᑦᔪᐊᒥᒃ ᐱᖁᔮᐱᒻᒥᒃ ᑲᔪᓯᓕᕐᑎᑕᐅᑎᑦᓯᑎᓪᓗᒋᑦ ᐊᑕᐅᓯᐊᕐᓱᑎᑦ ᐊᑐᕐᑕᐅᓲᑦ ᕿᓪᓕᑐᔦᑦ ᐴᑦ ᐊᑐᕐᑕᐅᑎᒍᓐᓀᓱᒋᑦ ᓂᐅᕕᕐᓂᐊᑐᓄᑦ ᐴᑦ ᓄᓇᓕᖓᓂ. ᐱᖁᔮᐱᒃ ᑲᔪᓯᔪᖅ ᐊᑐᕐᓱᓂᓗ ᐊᒻᒪᓗ ᓲᓱᒋᔭᐅᑦᓯᐊᓱᓂ ᓄᓇᓕᒻᒥᐅᓄᑦ ᑮᓇᐅᔭᑎᒍᑦ ᑭᑕᒐᓱᐊᕈᑎᓕᓐᓄᓗ. ᑖᑦᓱᒪ ᑭᖑᓂᐊᒍᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑮᓇᐅᔭᖃᕐᑎᓯᓐᓂᖁᑦ ᓴᓇᔭᐅᒍᑎᖏᓐᓂᑦ ᐁᑦᑐᑐᑎᐅᓂᖏᓐᓂᓗ ᐊᑐᕆᐊᓪᓚᒍᓐᓇᑐᐃᑦ ᐴᕐᓂᑦ ᓂᕿᓄᑦ ᑲᑎᖕᖓᔩᑦ ᐊᓪᓚᖑᐊᕐᓯᒪᒍᑎᖏᑦ ᓄᐃᑕᑎᓪᓗᒍ ᐊᑐᓂ ᓄᓇᕕᒻᒥ ᓄᓇᓕᓐᓂᑦ, ᑫᓪᓗᑐᐃᒐᓱᑦᓱᑎᑦ ᐊᑦᔨᐸᓱᖓᓂᒃ ᐱᖁᔮᐱᒻᒥ ᑲᔪᓯᓕᕐᑎᓯᖁᑦᓱᒋᑦ.

2018ᒥ, 10ᓂᑦ ᐊᕐᕌᒍᒋᓕᕐᑕᖓᓂ ᐱᖁᔮᐱᐅᑉ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐊᓪᓚᕕᖃᕐᓂᖁᑦ ᐅᑭᐅᕐᑕᑐᒥ ᓄᓇᓕᖏᓐᓂᑦ ᐱᖁᔮᐱᓕᐅᖁᔨᑦᓱᑎᑦ ᐊᑦᔨᐸᓱᖓᓂᒃ ᓄᓇᓕᒻᒥᓂ.

ᓱᒃᑯᓇᕐᑐᑕᓖᑦ ᐃᒋᑕᑦᓭᑦ

2005ᒥ, 2006 ᐊᒻᒪᓗ 2009ᒥᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑲᔪᕐᓯᓂᕐᖁᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ- ᑮᓇᐅᔭᖃᕐᑎᑕᐅᑦᓱᑎᑦ ᐃᓕᓐᓂᐊᓂᕐᒥᒃ ᓄᓇᕕᒻᒥᐅᑉ ᓄᓇᓕᖏᑦ ᑐᑭᓯᒪᒍᑎᑦᓴᓂᑦ ᖃᓄᐃᓗᕐᓗᑎᑦ ᑲᒪᒋᐊᖃᕐᒪᖔᑕ, ᓴᓂᕐᕓᓂᖅ, ᐊᒻᒪᓗ ᐊᐅᓪᓚᑎᑦᓯᓂᖅ ᐊᑦᑕᓴᕐᑐᓂᑦ ᐃᒋᑕᑦᓴᓂᑦ. ᐃᓕᓐᓂᐊᑎᑦᓯᒍᑎᒃ ᐱᓇᓱᐊᕐᑕᐅᔪᖅ ᐃᓗᓕᑕᓕᕕᓂᖅ ᐊᑦᑕᓇᕐᑐᓂᑦ ᐱᖁᑎᓂᑦ, ᐅᐃᒪᓇᕐᓯᔪᖃᕐᐸᑦ ᐊᑐᐃᓐᓇᕈᕐᑎᓯᒪᓂᖅ, ᐊᑦᑕᓇᕐᑐᐃᑦ ᐱᖁᑏᑦ ᓇᓗᓀᕐᑕᐅᒍᑎᖏᑦ, ᐊᐅᓚᑦᓯᒍᓰᑦ ᐊᒻᒪᓗ ᖃᓄᕐᑑᕈᑎᑦᓭᑦ, ᑲᕙᒪᑐᖃᒃᑯᑦ ᐊᒻᒪᓗ ᑯᐯᒃ ᐊᕙᑎᓕᕆᓂᕐᒥᒃ ᒪᓕᒐᖏᓐᓂᑦ, ᐊᑐᐃᓐᓇᕈᕐᑎᓂᖅ ᐱᓇᓱᐊᕐᓂᐅᒐᔭᕐᑐᓂᑦ ᐃᒪᕐᑎᒍᑦ ᐃᓂᕐᕋᐅᑎᑎᒍᑦ ᐊᐅᓪᓚᑎᑕᐅᓂᖏᑦ ᐊᒻᒪᓗ ᐊᑐᕆᐊᓪᓚᑐᑦᓴᓂᑦ ᐅᑎᕐᑎᓯᓃᑦ ᐊᒻᒪᓗ ᓴᓗᒻᒪᓴᕐᑕᐅᓂᕐᓄᑦ ᐊᑑᑎᔭᐅᒍᓐᓇᑐᓂᑦ ᓯᕿᓂᖓᓂ ᓄᓇᖁᑎᖓᑕ.

2007ᒥ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑮᓇᐅᔭᖃᕐᑎᓯᓐᓂᖁᑦ ᓄᐃᑕᐅᔪᑦᓴᓂᑦ ᐃᓕᔭᐅᓯᒣᓐᓇᓂᐊᓕᕐᑐᓂᑦ ᐊᑦᑕᓇᕐᑐᐃᑦ ᐃᒋᑕᐅᕕᖏᓐᓂᑦ ᐊᓪᓚᖑᐊᕐᓯᒪᔪᓂᑦ ᐊᑐᓂ ᓄᓇᓕᓐᓂᑦ ᓴᓂᒃᑯᕕᖏᓐᓂᑦ ᐊᑑᕆᐊᓪᓚᑐᑦᓴᓂᑦ ᐅᑎᕐᑎᓯᕕᓐᓄᓗ. ᐊᓪᓚᖑᐊᕐᓯᒪᔪᐃᑦ ᐊᓪᓚᓯᒪᔪᑦ ᑐᑭᓯᓇᕐᑎᓯᑦᓱᑎᑦ ᐊᑦᔨᒌᖕᖏᑐᓂᑦ ᐊᑦᑕᓇᕐᑐᓂᑦ ᐱᖁᑎᓂᑦ ᐃᓄᐃᑦ ᓴᓂᒃᑯᕕᒻᒨᓱᖏᓐᓂᑦ, ᐅᕝᕙᓗᓐᓃᑦ ᐃᒋᑕᐅᕕᖏᓐᓄᑦ, ᐊᒻᒪᓗ ᐊᑦᑕᓇᕐᑑᒍᑎᖏᓐᓂᑦ ᑕᒪᒋᓐᓄᑦ ᐃᓄᓐᓄᑦ ᐊᕙᑎᒧᓪᓗ ᑲᒪᒋᔭᐅᑦᓯᐊᖏᓐᓂᖏᓐᓄᑦ ᐃᓂᒋᒋᐊᓕᖏᓐᓄᑕᐅᖕᖏᑯᖏᓐᓄᑦ.

ᐊᑐᕐᓯᒪᔪᑦ ᐊᑦᓴᓗᐊᕕᓃᑦ

2006ᒥᑦ 2009ᒧᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑲᔪᕐᓯᓂᕐᖁᑦ RECYC-Québec ᐱᓇᓱᐊᕐᑕᕕᓂᖏᓐᓂᑦ ᓄᐃᑦᓯᓱᑎᑦ ᐊᑐᕆᐊᓪᓚᑐᑦᓴᓂᑦ ᐅᑎᕐᑎᓯᓃᑦ ᐱᓇᓱᐊᕐᑕᐅᔪᒥᒃ ᐊᑐᕐᓯᒪᔪᓂᑦ ᐊᑦᓴᓗᐊᕕᓂᕐᓂᑦ ᓄᓇᕕᒻᒥ ᑫᓪᓗᒋᐊᕐᓱᑎᑦ ᓄᓇᓕᓐᓂᑦ ᐊᑑᑎᖁᑦᓱᒋᑦ ᐃᑲᔪᕐᓯᒍᑎᖏᓐᓂᑦ ᑯᐯᒃ ᐊᐅᓚᑦᓯᓂᕐᒧᓕᖓᔪᓂᑦ ᐊᑦᓴᓗᐊᕕᓂᕐᓂᑦ. ᐊᑐᓂ ᓄᓇᓖᑦ 14 ᐃᓚᐅᓐᓂᖁᑦ ᐱᓇᓱᐊᕐᑕᐅᔪᒥ ᑖᒃᑯᓇᓂ ᐊᕐᕌᒍᓂᑦ ᐊᒻᒪᓗ ᐃᓚᖏᑦ ᓄᐊᑦᓯᖏᓐᓇᖁᑦ ᐊᐅᓪᓚᑎᑦᓯᓱᑎᓗ ᐊᑦᓴᓗᐊᓂᑦ ᓄᐊᑦᓯᕕᓐᓄᑦ.

http://www.mddelcc.gouv.qc.ca/matieres/inter.htm (ᐅᐃᒍᐃᑎᑑᕐᑐᐃᑦ ᑭᓯᐊᓂ)