ᖃᓄᐃᓗᕈᑕᐅᓚᖓᔪᓂᑦ ᐊᑐᐃᓐᓇᕈᕐᑎᓂᖅ
ᐊᕐᕌᒍᓄᑦ ᑕᓪᓕᒪᓄᑦ ᖃᓄᐃᓗᕈᑕᐅᓚᖓᔪᓂᑦ ᐊᑐᐃᓐᓇᕈᕐᑎᓂᖅ ᓄᐃᑦᓯᒍᑎᐅᕗᖅ ᑐᑭᒧᐊᒍᑎᒋᓂᐊᕐᑕᖏᓐᓂᑦ ᐅᓇᓗᑦᑕᐅᖅ ᒫᓐᓇᓯᐅᑎᒥᒃ ᐊᑯᓂᐅᒐᓚᑦᑐᒧᓗ ᖃᓄᐃᓕᖓᒐᓱᒍᒪᓂᖏᓐᓂᑦ ᓄᐃᑦᓯᒍᑎᐅᕗᖅ ᑲᔪᓯᑎᑦᓯᒍᓐᓇᓂᐊᕐᒪᑕ ᑐᕌᒐᕐᑖᕕᓂᒥᓂᑦ ᑲᑎᕕᒃ ᐊᕙᑎᓕᕐᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑎᓕᔭᐅᑦᓱᑎᑦ ᐊᑎᓕᐅᕐᑐᕕᓂᕐᓄᑦ ᔭᐃᒻᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᓂ ᐊᖏᖃᑎᒌᒍᑎᖓᓂ. ᑐᕌᒐᖃᕐᓱᑎᑦ ᖃᓄᐃᓗᕆᐊᒍᑎᒋᓚᖓᔭᖏᑦ ᓈᒻᒪᓈᑦᓯᐊᖁᑦᓱᒋᑦ ᐱᒻᒪᕆᖁᑎᒋᔭᐅᔪᓂᑦ ᐊᕙᑎᒧᓕᖓᔪᓂᑦ ᐃᓅᖃᑎᒌᑦᑐᐃᓗ ᓴᐳᒻᒥᔭᐅᒋᐊᖃᕐᓂᖏᓐᓄᓕᖓᔪᓂᑦ ᓄᓇᕕᒻᒥ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐊᔪᐃᓐᓇᖁᑦ ᐱᓇᓱᖃᑎᒌᑦᓯᐊᑎᑦᓯᓂᕐᒥᒃ ᖃᓄᐃᓕᖓᓂᕆᒍᒪᔭᖏᓐᓂᑦ ᑲᔪᓯᑎᒋᐊᓕᖏᓐᓂᓗ ᐃᓚᐅᖃᑎᐅᔪᑦ ᔭᐃᒻᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᓂ ᐊᖏᖃᑎᒌᓐᓂᖓᓄᑦ. ᑐᖕᖓᕕᒋᑦᓱᒍ ᐊᕐᕌᒍᓄᑦ ᑕᓪᓕᒪᓄᓕᖓᔪᖅ ᐊᑐᐃᓐᓇᕈᕐᑎᑕᐅᒪᔪᖅ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑐᕌᒐᓱᒻᒥᔪᑦ ᑲᔪᓯᑎᓗᒋᑦ, ᑲᕙᒪᓐᓂᑎᒍᑦ ᐱᒍᓐᓇᕕᖃᕐᓂᒥᑎᒍᑦ ᑮᓇᐅᔭᖃᕐᑎᑕᐅᓂᒥᑎᒍᓗ, ᖃᓄᐃᓘᕆᐊᕐᓗᑎᑦ ᐃᓱᒫᓗᒋᔭᑦᓴᔭᒥᓂᑦ ᐱᓗᐊᕐᑐᒥᒃ ᓄᑕᐅᓯᓕᕈᓐᓇᑐᓂᑦ ᐱᕙᓪᓕᐊᓂᕐᒧᓕᖓᔪᓂᑦ, ᓴᐳᒻᒥᔭᐅᒋᐊᖃᕐᓂᖏᑦ ᓄᓇᐃᑦ ᐊᑦᔨᒌᖕᖏᑐᑦ, ᓯᓚᐅᑉ ᐊᓯᑦᔨᐸᓪᓕᐊᓂᖓ ᐊᒻᒪᓗ ᖃᓄᐃᖕᖏᓯᐊᕐᑐᒥᒃ ᐃᓅᓯᖃᕆᐊᖃᕐᓂᖏᑦ ᓄᓇᕕᒻᒥᐅᑦ.