ᐃᓅᓯᓖᑦ ᖃᓄᐃᑦᑐᑐᐃᓐᓇᓂᑦ

ᐃᓗᓕᖏᑦ

ᓯᓚᕐᔪᐊᒥ ᓇᓂᑯᑦᓯᐊᓃᓐᓂᑯᒥᓄᑦ ᓄᓇᖓᑕᓗ ᖃᓄᐃᓕᖓᓂᖓᓄᑦ, ᓄᓇᕕᐅᑉ ᓄᓇᖓ ᐊᑦᔨᖃᖕᖏᑐᒥᒃ ᓄᓇᖃᕐᖁᖅ. ᑌᒪᐃᓕᖓᑎᓪᓗᒍ, ᓯᓚᕐᔪᐊᒥ ᐅᕐᖂᓯᕙᓪᓕᐊᓂᖓ ᐱᕙᓪᓕᐊᓂᑎᒍᓪᓗ ᐱᓇᓱᐊᕐᑕᐅᔪᐃᑦ ᐅᖁᒪᐃᑦᑑᑎᑦᓯᕗᑦ ᐱᐅᓯᕐᒥᓄᑦ ᐅᑎᕈᓐᓇᓂᖏᓐᓂᑦ ᐱᕈᕐᑐᐃᑦ ᐆᒪᔪᐃᓪᓗ ᓄᓇᖁᑎᖓᓂ.

ᖃᓄᐃᓕᖓᒐᓱᓐᓂᖏᑦ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓱᒪᒋᔭᖃᕐᖁᑦ ᐃᓄᐃᑦ ᓇᔅᑳᐱᒃᑯᓗ ᐃᓚᐅᒍᑎᒃ ᐊᑦᔨᒌᖕᖏᑐᓂᑦ ᐱᓇᓱᐊᕐᑕᐅᔪᓂᑦ ᓲᓱᒋᔭᐅᓂᕐᓴᐅᓗᑎᓗ ᖃᐅᔨᒪᒍᓯᑐᖃᖏᑦ ᓄᓇᖃᕐᖄᓯᒪᔪᐃᑦ ᐱᐅᓯᐅᒦᒋᐊᒐᔭᕐᓂᖓᓂᒃ ᐃᓘᓐᓈᒍᑦ ᖃᓄᐃᓕᖓᓕᕐᓂᖏᓐᓂᑦ ᐊᑦᔨᒌᖕᖏᑐᑦ ᓄᓇᐅᔪᑦ ᓄᓇᖁᑎᖏᓐᓂ. ᐃᓚᖏᑦ ᐆᒪᔪᐃᑦ ᓂᕿᒋᔭᐅᓪᓚᕆᒃᑯᑦ ᓄᓇᖁᑎᖓᓂ ᓄᓇᖃᕐᖄᓯᒪᔪᓄᑦ ᑕᒫᓂᒥᐅᓄᑦ ᐊᒻᒪᓗ ᐆᒪᔪᕐᓂᐊᑕᐅᓲᖑᑦᓱᑎᑦ, ᐃᖃᓪᓕᐊᑕᐅᓲᖑᑦᓱᑎᑦ ᒥᑭᒋᐊᕐᓂᐊᑕᐅᓲᖑᑦᓱᑎᓗ.

ᓴᐳᒻᒥᔭᑦᓴᓂᑦ ᐊᑐᐃᓐᓇᕈᕐᑎᓂᖅ ᐅᑭᐅᕐᑕᑐᒥ ᓄᓇᖁᑎᖓᓂ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓚᐅᓐᓂᖁᑦ ᑐᑭᓯᒪᖃᑎᒌᒐᓱᓐᓂᒧᓕᖓᔪᓄᑦ ᑯᐸᐃᒃ ᑲᕙᒪᖓ ᑐᑭᑖᕈᑎᓯᒋᒪᔭᖏᑦ ᓴᓂᕐᕙᐃᓚᖓᑦᓗᑎᑦ, 2035ᖑᓕᕐᐸᑦ, 50 ᐳᓴᓐᑦᓗᐊᖓᓂ ᐊᑐᐃᓐᓇᕈᕐᑎᑕᐅᒪᔪᖅ ᐅᑭᐅᕐᑕᑐᒥ ᓄᓇᖁᑎᖓᓄᓕᖓᔪᖅ ᐊᕙᑎᖓᑕ ᓴᐳᒻᒥᔭᐅᓂᑦᓴᖓᓂᒃ ᐊᒻᒪᓗ ᐊᓯᖏᓐᓂᑦ ᐱᑦᔪᑎᖃᕋᔭᕐᓗᑎᑦ. ᐱᖁᔭᖅ 65, ᐱᖁᔭᖅ ᓄᓇᐅᑉ ᖃᓄᐃᓕᖓᓂᖓᓂᒃ ᓱᒃᑯᑕᐅᑎᑦᓯᑕᐃᓕᓂᕐᒧᓕᖓᔪᖅ ᐊᒻᒪᓗ ᓱᕐᕋᑕᐅᓗᐊᕋᓂ ᐱᕙᓪᓕᐊᓂᕐᒥᒃ ᓄᓇᖁᑎᖓ ᐅᑭᐅᕐᑕᑐᒥ ᐊᑐᐃᓐᓇᕈᕐᑎᑕᐅᒪᔪᖅ ᐅᖃᕐᑕᐅᒪᕗᖅ ᑲᔪᓯᑎᑕᒍᒫᕐᓂᐊᑎᓪᓗᒍ ᐊᒻᒪᓗ ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦᑕ ᖃᓄᐃᓕᖓᒐᓱᓐᓂᒥᒃ ᐊᓪᓚᓯᒍᑎᒋᓯᒪᕙᐅ ᐱᑦᔪᑎᖃᕐᓱᑎᑦ ᓄᓇᐅᑉ ᐊᑐᐃᓐᓇᕈᕐᑎᑕᐅᓂᖓᓄ, ᓴᐳᒻᒥᔭᐅᒋᐊᓖᑦ ᓄᓇᐃᑦ, ᐃᓄᓐᓄᑦ ᓱᕐᕋᑕᕕᓃᑦ ᓄᓇᐃᑦ ᐊᒻᒪᓗ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᒧᓕᖓᔪᑦ.

ᓄᐃᑦᓯᒋᐊᖕᖓᐅᑎᒃ ᖃᓄᐃᓕᖓᒐᓱᓐᓂᐅᔪᓂᑦ ᐊᑐᐃᓐᓇᕈᕐᑎᑕᐅᔪᖅ ᓄᓇᐃᑦ ᐊᑦᔨᒌᖕᖏᑐᑦ 2011-2020 - ᐊᕙᑎᓕᕆᓂᖅ ᑲᓇᑕᒥ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓱᒪᒋᔭᖃᕐᖁᑦ ᓄᐃᑕᐅᒋᐊᖕᖓ 2020ᒥ ᓄᓇᓂᑦ ᐊᑦᔨᒌᖕᖏᑐᓂᑦ ᖃᓄᐃᓕᖓᒍᒪᓂᖏᓐᓄᓕᖓᔪᖅ ᐊᒻᒪᓗ ᑐᕌᒐᖏᑦ ᑲᓇᑕᐅᑉ ᐅᓐᓂᑐᑦᔨᒋᐊᖃᕐᑐᕆᕙᖏᑦ ᓴᐳᒻᒥᓂᕐᓴᐅᖁᑦᓱᒋᑦ ᓱᒃᑯᑎᕐᑕᐅᑕᐃᓕᓂᕐᓴᐅᓗᑎᓗ ᐅᑭᐅᕐᑕᑐᒥ ᐅᑭᐅᕐᑕᑑᓪᓗ ᓯᕿᓂᖓᑕ ᓄᓇᖁᑎᖏᓐᓂ ᐃᓚᐅᒻᒥᔪᑦ ᑲᓇᑕᐅᑉ ᐃᒪᖁᑎᖏᑦ ᓄᓇᖁᑎᖏᓪᓗ. ᐃᓱᒪᒋᔭᖃᕐᒥᔪᑦ ᑐᑭᓯᒪᑦᓯᐊᓂᖅ ᐅᑭᐅᕐᑕᑑᑉ ᐊᑦᔨᒌᖕᖏᑐᖁᑎᖏᓐᓂᑦ ᓱᑲᓯᐅᒥᑎᑕᐅᔪᑦᓴᐅᒋᐊᖓ ᐃᓚᐅᒻᒥᑎᓪᓗᒍ ᐃᓗᕐᕈᓯᑎᒍᑦ ᖃᐅᔨᒪᒍᓯᑐᖃᐅᔪᑦ.

– ᖃᓄᐃᓕᖓᒐᓱᓐᓂᖏᓐᓂᑦ ᐊᓪᓚᑕᕕᓂᖓ ᓄᐃᑕᐅᒋᐊᖕᖓᐅᑎ 2020ᒥ ᓄᓇᓂᑦ ᐊᑦᔨᒌᖕᖏᑐᓂᑦ ᖃᓄᐃᓕᖓᒍᒪᓂᖏᑦ ᐊᒻᒪᓗ ᑲᓇᑕᐅᑉ ᑐᕌᒐᖏᑦ (ᔭᓄᐊᕆ 2013)

ᓯᓚᕐᔪᐊᒥ ᐋᑉᐳᖓᐃᑦᓴᓂᕐᒧᓕᖓᔪᓂᑦ ᑲᑎᒪᓂᖅ: ᐊᑐᐃᓐᓇᕈᕐᑎᓂᖅ ᓄᓇᐅᑉ ᓴᐳᒻᒥᔭᐅᒋᐊᖃᕐᓂᖏᓐᓂᑦ ᑯᐸᐃᒃ ᐅᑭᐅᕐᑕᑐᖓᑕ ᓄᓇᖁᑎᖏᓐᓂ, ᐊᕐᓱᕈᒍᑎᐅᔪᑦ ᐊᕐᕌᒍᓂᑦ ᖁᓕᓂᑦ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᖃᐅᔨᒋᐊᕈᒪᔪᐹᓗᐃᑦ ᓄᓇᓕᕆᓂᕐᒧᑦ ᐊᑐᐃᓐᓇᕈᕐᑎᓂᖏᓐᓂᑦ ᑐᕐᖃᑕᕐᕕᖓ ᐱᕙᓪᓕᐊᓂᕐᓂᑦ ᐊᕗᖓᐅᓕᒍᓐᓇᑐᓂᑦ, ᐊᕙᑎᒧᑦ ᐊᒻᒪᓗ ᐃᑯᓪᓚᑎᑦᓯᒐᓱᓐᓂᒧᑦ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ. ᑖᓐᓇ ᐱᑦᔪᑎᒋᑦᓱᒍ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑎᑦ ᑲᑎᒪᔨᖏᑦ ᑲᑎᖕᖓᔨᖓ ᑲᑎᖕᖓᔪᓅᖃᑕᐅᓐᓂᖁᖅ ᐊᐃᕆᓕ 2012ᒥ. ᐱᑦᔪᑎᖓ ᑖᑦᓱᒪ ᑲᑎᖕᖓᓂᐅᑉ ᓄᐃᑦᓯᒐᓱᑦᓱᑎᑦ ᑐᑭᓯᒪᖃᑎᒌᓐᓂᒥᒃ ᓴᐳᒻᒥᔭᐅᒋᐊᖃᕐᓂᒧᓕᖓᔪᓂᑦ ᑲᔪᓯᓕᕐᑎᑕᐅᓂᑦᓴᖏᓐᓄᓕᖓᔪᓂᑦ ᑲᕙᒪᐅᑉ ᑲᔪᓯᓕᕐᑎᒐᒍᒫᕐᓂᐊᑕᖏᓐᓂᑦ ᓴᐳᒻᒥᒐᔭᕐᓗᑎᑦ 50 ᐳᓴᓐᑦᓗᐊᖓᓂᒃ ᐊᑐᐃᓐᓇᕈᕐᑎᑕᐅᒪᔪᒥᒃ ᐅᑭᐅᕐᑕᑑᑉ ᓄᓇᖁᑎᖏᓐᓂᑦ.