ᓄᓇᕕᒃ ᓄᓇᖃᕐᖁᖅ ᐊᒥᓱᓂᑦ ᐊᕙᑎᖓᓂᒃ ᐊᑦᔨᖃᙱᑐᓂᑦ ᓄᓇᐃᓪᓗ ᓴᐳᒻᒥᔭᐅᒋᐊᖃᕐᓱᑎᑦ. ᑕᐃᒣᑦᑎᓗᒍ, ᐃᓚᖏᑦ ᓄᓇᐃᑦ ᐃᓕᑕᕆᔭᐅᓯᒪᕗᑦ ᓴᐳᒻᒥᔭᑦᓴᓕᐊᖑᑦᓱᑎᓗ ᑯᐸᐃᒃ ᑲᕙᒪᖓᓄᑦ ᒥᕐᖑᐃᓯᕐᕕᓕᐊᖑᑦᓱᑎᑦ ᓴᐳᒻᒥᔭᑦᓴᓕᐊᖑᑦᓱᑎᓗᓐᓃᑦ. ᐃᓄᓕᒫᕐᓯᓂᖅ ᑲᑐᑦᔨᖃᑎᖃᕐᓂᓗ ᓄᓇᓕᓐᓂᑦ ᒥᕐᖑᐃᓯᕐᕖᑦ ᓄᓀᓗ ᓴᐳᒻᒥᔭᐅᔪᑦᓴᐅᔪᑦ ᐱᓇᓱᐊᕐᑕᐅᔪᑦ ᐱᐅᓯᐅᒦᒋᐊᕐᓂᐊᒪᑕ ᓴᐳᒻᒥᔭᐅᓂᖏᓐᓂᑦ ᐃᓄᐃᑦ, ᑯᕆᒃᑯᑦ ᐊᒻᒪᓗ ᓇᔅᑳᐱ ᐆᒪᔪᕐᓂᐊᓂᖏᑦ ᐊᒻᒪᓗ ᐃᓗᕐᕈᓯᕐᑎᒍᑦ ᐊᑑᑎᓲᖏᑦ.  ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᓄᓇᕕᒻᒥ ᒥᕐᖑᐃᓯᕐᕕᑯᖏᑎᒍᑦ ᐱᓇᓱᖃᑎᖃᕐᓱᑎᓗ ᑐᕐᖃᑕᕐᕕᖓᓂᒃ ᐱᕙᓪᓕᐊᓂᕐᒧᑦ ᑖᕗᖓᐅᓕᒍᓐᓇᑐᓂᑦ ᐊᕙᑎᒧᑦ ᐃᑯᓪᓚᑎᑦᓯᒐᓱᓐᓂᒧᓪᓗ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᖓᓂᒃ ᐊᒻᒪᓗ ᑐᕐᖃᑕᕐᕕᖓ ᓇᐹᕐᑐᓕᕆᓂᕐᒥᒃ, ᐆᒪᔪᓕᕆᓂᕐᒥᒃ ᒥᕐᒍᐃᓯᕐᕕᓕᕆᓂᕐᓗ (ᓇᐹᕐᑐᐃᑦ, ᐆᒪᔪᐃᑦ ᒥᕐᖑᐃᓯᕐᕖᓗ), ᑲᒪᒋᔭᖃᕐᖁᑦ ᐊᐅᓚᑕᐅᓂᖏᓐᓂᑦ ᒥᕐᖑᐃᓯᕐᕖᑦ ᓄᓇᐃᓗ ᓴᐳᒻᒥᔭᐅᔪᑦ, ᓴᐳᒻᒥᔭᐅᓂᖏᑦ ᐱᐅᓯᐅᒥᑎᑕᐅᓂᖏᓪᓗ ᓱᖃᑦᓯᓂᐅᔪᐃᑦ.

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑲᒪᒋᔭᖃᕆᐊᓪᓛᖃᑦᑕᓂᐊᕐᑐᑦ ᑯᐯᒃᒥ ᒥᕐᖑᐃᓯᕐᕕᓕᐊᕆᔭᐅᔪᑦᓴᓂᑦ ᓴᐳᒻᒥᔭᐅᔪᑦᓴᓂᓗ ᓄᓇᓂᑦ ᓇᓗᓀᕐᑕᐅᒐᓱᓐᓂᖏᓐᓂᑦ ᓄᓇᕕᒻᒥ ᐊᒻᒪᓗ ᑐᓂᔨᓗᑎᑦ ᐅᓐᓂᑑᑎᓕᐊᒥᓂᒃ ᐊᖓᔪᕐᖃᐅᑎᓄᑦ. ᐃᓚᐅᓗᑎᑦ ᐃᓄᓕᒫᕐᓯᓂᕐᓄᑦ ᐊᒻᒪᓗ ᐅᖃᐅᓯᑦᓴᖃᕐᕕᖃᕐᓗᑎᑦ ᐊᖓᔪᕐᖃᐅᑎᐅᔪᓄᑦ. ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᕐᓴᓯᐅᕐᑏᑦ ᑲᑎᒪᔨᖏᑦ ᐃᑉᐱᒋᔭᖃᓗᐊᖕᖑᐊᓗᑎᑦ ᓴᐳᒥᔭᐅᒋᐊᖃᕐᓂᖏᓐᓂᑦ ᐃᓄᐃᑦ ᐊᒻᒪᓗ ᐃᓚᐅᑎᑕᐅᑉᐸᑕ ᓇᒡᑳᐱᒃᑯᑦ ᐆᒪᔪᕐᓂᐊᓂᕐᒧᑦ, ᐃᖃᓪᓕᐊᓂᕐᒧᑦ ᒥᑭᒋᐊᕐᓂᐊᓂᕐᒧᓗ ᐱᒍᓐᓇᐅᑎᖏᑦ, ᐳᓚᕋᕐᑐᓄᑦ ᖃᓄᐃᓗᕈᑎᐅᓚᖓᔪᓂᑦ, ᐊᕙᑎᐅᑉ ᓴᐳᒻᒥᔭᐅᒋᐊᖃᕐᓂᖓᓂᒃ, ᐃᓗᕐᕈᓯᒥᒃ ᓴᐳᒻᒥᓂᕐᒧᑦ (ᑐᓂᕐᑕᓂᐊᕐᕖᑦ ᐃᓂᖏᑦ), ᒥᕐᖑᐃᓯᕐᕕᓴᐅᑉ ᑭᓪᓕᖏᓐᓂᑦ, ᐃᓚᐅᒻᒥᑎᓪᓗᒍ ᐅᔭᕋᕐᓂᐊᕕᑦᓴᐅᑎᐃᓐᓇᕆᐊᓖᑦ ᒥᕐᖑᐃᓯᕐᕖᑦ ᓴᓂᐊᓃᑦᑐᑦ.

ᐅᓕᑦᑕᓂᐅᔭᓕᒃ ᒥᕐᖑᐃᓯᕐᕕᒃ (ᒧᖕ ᐱᕋᒥᑦ) ᒥᕐᖑᐃᓯᕐᕕᓴᖅ 5,511 ᑭᓚᒥᑕᓂᑦ ᓯᒃᑭᑕᓪᓗᐊᓂᑦ ᐊᖏᓂᓕᒃ. ᐅᑭᐅᕐᑕᑐᒥᒃ ᓄᓇᓕᖓᑕ ᑲᖏᕐᓱᐊᓗᑦᔪᐊᖅ ᓴᓂᐊᓃᑦᑐᖅ, ᒥᕐᖑᐃᓯᕐᕕᓴᖅ ᓴᐳᒻᒥᔪᑦᓴᓕᐊᖑᒪᔪᖅ ᐃᓚᖏᓐᓂᑦ ᓄᓇᖁᑎᖓᓂ ᑕᐃᔭᐅᔪᒥ ᑲᖏᕐᓱᐊᓗᑦᔪᐊᑉ ᖃᕐᖃᖏᑦᑕ ᖄᖏᓐᓂ ᒪᓂᕋᕐᓂᖅ. ᐃᓚᐅᑦᓱᑎᑦ ᑕᓯᕐᓚᒃ, ᖃᒪᓂᐊᓗᒃ, ᐊᓪᓕᖓᓂ ᑐᑦᑐᓯᐅᕐᕕᐅᑉ ᑰᖓᑕ ᐊᒻᒪᓗ ᓇᕐᓴᖓ ᑲᖏᕐᓱᐊᓗᑦᔪᐊᑉ. ᐊᐃᕆᓕ 2015ᒥ, ᑯᐸᐃᒃ ᑲᕙᒪᖓ ᑐᓴᕐᑎᓯᒍᑎᓕᐅᕐᑐᕕᓂᖅ ᒥᕐᖑᐃᓯᕐᕕᖑᑐᐃᓐᓇᕆᐊᖃᕐᓂᖓᓂᒃ ᐅᑭᐊᖑᓕᕐᐸᑦ.

– ᖃᓄᐃᓕᖓᒐᓱᓐᓂᖏᑦ ᐱᑦᔪᑎᓕᒃ ᐅᓕᑦᑕᓂᐅᔭᓕᒃ (ᒧᖕ ᐱᕋᒥᑦ) ᒥᕐᖑᐃᓯᕐᕕᓴᖅ (ᓄᕕᒻᐱᕆ 2011)

ᒥᕐᖑᐃᓯᕐᕕᒃ ᑐᕐᓱᔪᖅ ᒥᕐᖑᐃᓯᕐᕕᖑᓐᓂᖁᖅ ᐅᐱᕐᖔᖓᓂ 2013 ᐊᖏᓂᓕᒃ 26,107 ᑭᓚᒥᑕᓂᑦ ᓯᒃᑭᑕᓪᓗᐊᓂᑦ. ᒥᕐᖑᐃᓯᕐᕕᓚᐅᓂᕐᐹᖅ ᑯᐸᐃᒃᓕᒫᒥ ᒥᕐᖑᐃᓯᕐᕕᖏᓐᓂᑦ. ᐅᑭᐅᕐᑕᑐᒥ ᓄᓇᓕᖓᑕ ᐅᒥᐅᔭᐅᑉ ᓴᓂᐊᓃᑦᑐᖅ, ᒥᕐᖑᐃᓯᕐᕕᒃ ᐅᐊᓕᓂᖓᓂᑦ ᖃᕙᙵᓂᖓᓄᑦ ᐃᒪᕐᐱᒥ ᐱᒋᐊᕐᓱᓂ ᕿᓚᓗᒐᕐᓯᐅᕕᒻᒥ ᐊᒻᒪᓗ ᑕᓯᐅᔭᒥ ᑰᕝᕕᖏᓐᓂ, ᐃᓚᐅᒻᒥᑎᓪᓗᒍ ᐊᓪᓚᐃᑦ ᖃᓯᒋᐊᓕᖓ ᑰᖓᓗ ᐊᒻᒪᓗ ᑰᕝᕕᖏᑦ, ᑕᕐᕋᖓᓃᑦᑐᖅ ᖃᓯᒋᐊᓖᑦ ᑕᓯᖓ, ᑕᕐᕋᖓᓃᑦᑐᖅ ᑭᓪᓕᖓ, ᒥᕐᖑᐃᓯᕐᕕᒧᑦ ᐃᓚᒋᔭᐅᒻᒥᔪᖅ ᐸᑎᑦᑑᖅ ᑰᖓ ᐊᒻᒪᓗ ᑰᕝᕕᓕᒫᖓ, ᐃᓚᐅᑎᓪᓗᒍ ᓯᕿᓂᖓᓃᑦᑐᖅ ᖃᓯᒋᐊᓕᒃ ᑕᓯᖅ.

– ᖃᓄᐃᓕᖓᒐᓱᓐᓂᖏᑦ ᐊᓪᓚᓯᒪᔪᑦ ᐱᑦᔪᑎᓕᒃ ᑕᓯᐅᔭᖅ ᐊᒻᒪᓗ ᐊᓪᓚᐃᑦ ᖃᓯᒋᐊᓕᖓ ᒥᕐᖑᐃᓯᕐᕕᓴᐅᓂᖓ (2008)

ᒥᕐᖑᐃᓯᕐᕕᒃ ᑰᕈᕐᔪᐊᖅ  ᒥᕐᖑᐃᓯᕐᕕᕈᕐᓂᖁᖅ 2009ᒥ ᐊᖏᓂᖃᕐᓱᓂᓗ 4,460.8 ᑭᓚᒥᑕᓂᑦ ᓯᒃᑭᑕᓪᓗᐊᓂ. ᐅᑭᐅᕐᑕᑐᒥ ᓄᓇᓕᖓᑕ ᑲᖏᕐᓱᐊᓗᑦᔪᐊᖅ ᓴᓂᐊᓃᑦᑐᖅ, ᒥᕐᖑᐃᓯᕐᕕᐅᑉ ᐃᓚᖓ ᓄᓇᒥᒃᑯᒃ ᑐᕐᖓᐃᑦ ᖃᕐᖃᖏᓐᓂᑦ, ᐃᓚᐅᑎᓪᓗᒍ ᖃᕐᖃᖓ ᐃᐱᕐᕕᓪ (ᐳᕐᑐᓂᓕᒃ 1646 ᒥᑕᓂ) ᓇᕐᓴᖓ ᑰᕈᕐᔪᐊᖅ ᑰᑦᑐᐃᑦᓗ ᑕᕝᕗᖓ, ᐃᓚᐅᒻᒥᑎᓪᓗᒍ ᑲᖏᕐᓱᐊᓗᑦᔪᐊᑉ ᑕᕐᕋᖓᓂ ᓯᓈᖓ ᑲᑎᑯᕆ 1 ᓄᓇᖁᑎᒋᕙᖏᑦ. ᑎᑭᖕᖏᑐᑭᓯᐊᓂ ᓄᕗᓕᐊᓘᑉ ᓄᓇᖁᑎᖓᑕ ᓯᕿᓂᖓᓄᑦ ᐅᕝᕙᓗᓐᓃᑦ ᑕᓯᑲᓪᓚᒥᒃ ᑰᕝᕕᖏᓐᓂᓗ ᑕᕐᕋᖓᓂ.

– ᖃᓄᐃᓕᖓᒐᓱᓐᓂᖏᑦ ᐱᑦᔪᑎᖃᕐᓱᑎᑦ ᑰᕈᕐᔪᐊᖅ ᒥᕐᖑᐃᓯᕐᕕᓴᖓᓂᒃ (ᐊᐃᕆᓕ 2007)

ᒥᕐᖑᐃᓯᕐᕕᒃ ᐱᖑᐊᓗᐃᑦ ᓯᕗᓪᓕᐸᐅᑦᓱᓂ ᒥᕐᖑᐃᓯᕐᕕᓕᐊᕕᓂᖅ ᓄᓇᕕᒻᒥ. ᒥᖕᖑᐃᓯᕐᕕᖑᕐᓱᓂ 2004ᒥ, ᐊᖏᓂᓕᒃ 1,133.9 ᑭᓚᒥᑕᓂᑦ ᓯᒃᑭᑕᓪᓗᐊᓂᑦ. 100 ᑭᓚᒥᑕᒐᓚᓐᓂᑦ ᐅᖓᓯᓐᓂᓕᒃ ᐅᑭᐅᕐᑕᑐᒥ ᓄᓇᓕᖓᓄᑦ ᑲᖏᕐᓱᔪᐊᖅ, ᒥᕐᖑᐃᓯᕐᕕᒃ ᓴᐳᒻᒥᔭᐅᑎᑦᓯᕗᖅ ᐱᖑᐊᓗᐃᑦ ᑕᓯᖓᓂᒃ, ᓄᓇᐅᑦᓱᓂ ᐊᑦᔨᖃᖕᖏᑐᖅ, ᓄᓇᖁᑎᖓᓂ ᐊᒻᒪᓗ ᓄᓇᖁᑎᖓᓂᒃ ᑕᐃᔭᐅᔪᒥᒃ ᐅᖓᕙᐅᑉ ᖃᕐᖃᖏᑦᑕ ᒪᓂᕋᕐᓂᖓ. ᐳᕕᕐᓂᑑᑉ ᑰᖓᑕ ᓇᕐᓴᖓᓂᒃ, ᑰᑦᑐᒃ ᒥᕐᖑᐃᓯᕐᕕᐅᑉ ᑕᕐᕋᖓᓂᑦᓱᓂ ᑭᓪᓕᖓᓂ, ᐱᕈᕐᑐᓕᐹᓗᒃ ᐊᒻᒪᓗ ᐊᑦᔨᒌᖕᖏᑐᓂᑦ ᐆᒪᔪᖃᕐᓱᓂ.

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᖃᐅᔨᒋᐊᖃᑦᑕᖁᑦ ᐱᓇᓱᐊᕐᑕᐅᓂᖏᓐᓂᑦ ᓴᐳᒻᒥᔭᐅᔪᑦᓴᐃᑦ ᓄᓇᐃᑦ ᓄᓇᕕᒻᒥ. ᑌᒪᐃᒐᓗᐊᕐᑎᓗᒍ, ᒫᓐᓇᐅᑎᓪᓗᒍ ᐱᕙᓪᓕᐊᔭᐅᖕᖏᑐᑦ ᑖᒃᑯᓄᖓᓄᓕᖓᔪᑦ.

– ᖃᓄᐃᓕᖓᒐᓱᓐᓂᖏᓐᓂᑦ ᐊᓪᓚᓯᒪᔪᖅ ᐱᑦᔪᑎᓕᒃ ᑲᕙᒪᐅᑉ ᓴᓂᕐᕓᒐᓱᓐᓂᖏᑦ 50 ᐳᓴᓐᑦᓗᐊᒥᒃ ᐅᑭᐅᕐᑕᑐᒥ ᐊᑐᐃᓐᓇᕈᕐᑎᑕᐅᒪᔪᖅ ᓄᓇᖁᑎᖏᓐᓂᑦ ᐊᕙᑎᖓᑕ ᓴᐳᒻᒥᔭᐅᓂᑦᓴᖓᓄᑦ, ᐃᓚᐅᑎᓗᒋᑦ ᐊᑦᔨᒌᖕᖏᑐᐃᑦ ᓄᓇᐅᔪᑦ, ᓄᐃᑕᑎᑦᓯᒐᓱᑦᓱᑎᑦ ᓄᓇᐅᑉ ᖃᓄᐃᓕᖓᓂᖏᑦ ᐊᒻᒪᓗ ᐊᑦᔨᒌᖕᖏᑐᓂᑦ ᐱᕙᓪᓕᐊᑕᐅᒍᓐᓇᑐᓂᑦ ᓴᓇᓂᕐᓄᓕᖓᖕᖏᑐᓂᑦ (2011)