ᑐᑭᓯᑎᑦᓯᒋᐊᖕᖓᐅᑎᒃ

ᓱᕐᕋᑕᐅᒪᔪᓂᒃ ᖃᐅᔨᓴᕐᓂᖅ ᐱᕙᓪᓕᐊᑎᑦᓯᓂᕐᒧᑦ ᐸᕐᓀᓂᕐᒧᑦ ᐱᓇᓱᐊᕈᑎᐅᕗᖅ ᑐᕌᒐᖃᕐᓱᓂ ᑲᔪᓯᒍᓐᓇᑐᓂᒃ ᐊᑐᕐᓂᒧᑦ ᐊᑐᕋᑦᓴᓂᒃ ᐊᒻᒪᓗ ᓄᓇᓂᒃ. ᐊᑐᓕᕐᑎᑕᐅᓂᖓᑕ ᓯᕗᓂᐊᓂ ᐱᕙᓪᓕᐊᑎᑕᐅᓂᕐᒧᑦ ᐱᓇᓱᐊᕐᑕᐅᔪᑦ, ᓱᕐᕋᑕᐅᒪᔪᓂᒃ ᖃᐅᔨᓴᕐᓂᖅ ᖃᐅᔨᓴᕐᓂᖃᓲᑦ ᐊᒻᒪᓗ ᕿᒥᕐᕈᓱᑎᒃ ᐃᓘᓐᓇᖏᓐᓂᒃ ᐱᑦᔪᑕᐅᔪᓂᒃ ᐊᑦᑐᐃᓂᖃᓲᓂᒃ ᐆᒪᔪᐃᑦ ᓇᔪᒐᖏᓐᓂᒃ, ᐊᑐᕋᑦᓴᓂᒃ ᐊᒻᒪᓗ ᐃᓅᓯᐅᑉ ᐱᐅᔫᓂᖓᓂᒃ ᓄᓇᓕᓐᓄᑦ ᐱᓇᓱᐊᕐᕕᐅᒐᓱᑦᑐᓄᑦ. ᐃᓄᓕᒫᓄᑦ ᑐᓴᐅᒪᑎᑦᓯᒍᑏᑦ ᐊᒻᒪᓗ ᖃᐅᔨᒋᐊᕐᕕᖃᕈᑏᑦ ᐃᑉᐱᒋᔭᖃᓲᑦ ᐃᓱᒪᒋᓕᐅᑦᔨᓂᖏᓐᓂᒃ ᐱᒍᓐᓇᐅᑎᐅᔪᓂᒃ, ᐃᓪᓕᕆᔭᐅᔪᓂᒃ ᐊᒻᒪᓗ ᐃᓱᒫᓗᑎᐅᔪᓂᒃ ᐃᒻᒥᒎᓈᕐᑎᑐᓄᑦ, ᐊᕕᑦᑐᓯᒪᔪᓄᑦ ᐊᒻᒪᓗ ᓄᓇᓕᓐᓄᑦ. ᓱᕐᕋᑕᐅᒪᔪᓂᒃ ᖃᐅᔨᓴᕐᓂᖅ ᑐᕌᒐᓕᒃ ᐱᐅᓯᐅᒥᑎᑦᓯᓂᕐᒥᒃ ᐱᕙᓪᓕᐊᑎᑕᐅᔪᓄᑦ ᐱᓇᓱᐊᕐᑕᐅᔪᓄᑦ ᐋᕐᕿᓱᕐᑕᐅᓂᖏᓐᓄᑦ ᒥᑭᓕᒋᐊᕐᑎᓯᒐᓱᐊᕐᓱᑎᒃ (ᐊᓪᓛᑦ ᓄᖑᑎᑦᓯᓗᑎᒃ) ᓱᓇᑐᐃᓐᓇᓂᒃ ᐱᐅᖕᖏᑐᒥᒃ ᓱᕐᕃᓂᐅᔪᓂᒃ ᐊᒻᒪᓗ ᐱᐅᓯᐅᒥᑎᑦᓯᓗᑎᒃ ᐱᐅᔪᓂᒃ ᓱᕐᕃᓂᐅᔪᓂᒃ ᐃᓄᓐᓄᑦ ᐊᒻᒪᓗ ᐆᒪᓂᖃᖃᑎᒌᑦ ᐊᕙᑎᖏᓐᓄᑦ.

ᒪᓕᑦᓱᒋᑦ ᐱᖁᔭᓕᐊᕆᔭᐅᔪᑦ ᒪᓕᒐᓕᐊᕆᔭᐅᔪᐃᓪᓗ ᐊᑑᑎᒍᓐᓇᑐᑦ ᓄᓇᕕᒻᒥ, ᐱᔭᑦᓴᓂᒃ ᐸᕐᓇᕋᑦᓭᓗ ᓄᓇᓂᒃ ᐱᑦᔪᑎᒋᓪᓗᒋᑦ ᐊᕙᑎᓂᒃ ᑲᒪᔨᐅᓂᕐᒧᑦ ᐊᑐᐃᓐᓇᐅᕐᑎᑕᐅᑦᓯᐊᕆᐊᓖᑦ ᖃᐅᔨᒪᐅᑎᖏᑦ ᐱᔭᑦᓴᓄᑦ ᐊᒻᒪᓗ ᐊᑦᑐᐃᓂᒋᒍᓐᓇᑕᖏᑦ ᐊᕙᑎᒥᒃ ᐃᓄᖏᓐᓂᓗ. ᖃᐅᔨᓴᐅᑏᑦ ᒪᓕᓪᓗᒋᑦ, ᑎᒥᐅᔪᐃᑦ ᑲᒪᔨᐅᒍᓐᓇᑐᑦ ᐊᖏᕈᑎᖃᕆᐊᖃᓯᒍᑎᒃ ᐊᑕᐅᓯᕐᒥᒃ ᐊᒥᓱᓂᓪᓘᓃᑦ ᐊᒻᒪᓗ, ᕆᐊᖃᕐᐸᑦ, ᒪᓕᒐᖃᕆᐊᖃᕐᓂᐊᒪᖔᑦᑕ.

ᓄᓇᕕᒻᒥ, ᓱᕐᕋᑕᐅᒪᔪᓂᒃ ᖃᐅᔨᓴᕐᓂᖅ ᑐᖕᖓᕕᓖᑦ ᐱᓇᓱᐊᕐᑕᐅᓂᖏᑎᒍᑦ ᐱᑕᖃᕐᑎᑕᐅᔪᓄᑦ ᐊᑦᔨᒌᖕᖏᑐᓄᑦ ᓄᓇᐅᑉ ᐊᑐᕐᑕᐅᓂᖓᓄᑦ ᐊᖏᐊᑎᒌᒍᑎᓄᑦ ᐊᒻᒪᓗ ᑲᕙᒪᑐᖃᒃᑯᓄᑦ ᐊᒻᒪᓗ ᑯᐯᒃᑯᓄᑦ ᒪᓕᒐᓕᐊᖑᓯᒪᔪᓄᑦ. ᑌᒣᑦᑎᓗᒍ, ᐊᒥᓱᐃᑦ ᓱᕐᕋᑕᐅᓯᒪᔪᓄᑦ ᖃᐅᔨᓴᕐᓃᑦ ᐱᓇᓱᐊᕐᑕᓂᖏᑦ ᐊᐅᓚᑦᔭᑕᐅᒍᓐᓇᑐᑦ ᐱᓇᓱᐊᕐᑕᐅᔪᒧᑦ, ᖃᓄᐃᑦᑑᓂᖓ ᒪᓕᓪᓗᒍ, ᐱᔪᓐᓇᓂᖃᕕᒋᔭᐅᔪᑦ ᐊᒻᒪᓗ ᐱᓇᓱᐊᕐᑕᐅᔪᑦ ᐊᒻᒪᓗ ᓱᕐᕋᑕᐅᒪᔪᑦ.

ᐱᑦᔪᑎᒋᓗᒋᑦ ᐊᔪᕐᓇᓂᖏᑦ ᐊᒻᒪᓗ ᐊᑦᔨᒌᖕᖏᑑᓂᖏᑦ, KEAC-ᒃᑯᑦ ᐃᑉᐱᒍᓱᑦᑐᑦ ᐱᒻᒪᕆᐅᓂᖓᓂᒃ ᓲᖑᓯᑎᑦᓯᒋᐊᕐᓂᒥᒃ ᑐᑭᓯᒪᔭᐅᓂᖓᓂᒃ ᓱᕐᕋᑕᐅᒪᔪᓄᑦ ᖃᐅᔨᓴᕐᓂᒥᒃ ᐱᓇᓱᐊᕐᑕᐅᒍᑎᖏᓐᓂᒃ ᐊᑐᕐᑕᐅᔪᓂᒃ ᓄᓇᕕᒻᒥ. ᐅᓐᓂᑐᑦᔨᒥᑦᓱᓂᓗ ᐃᓄᓕᒫᓂᒃ ᐃᓚᐅᑎᑦᓯᓂᕐᒥᒃ ᐱᒋᐊᖕᖓᓂᖏᓐᓂ ᓇᓪᓗᑐᐃᓐᓇᖏᑦ ᐱᓇᓱᐊᕐᑕᐅᔪᑦ ᐊᒻᒪᓗ ᐱᒋᐊᖕᖓᓂᖏᓐᓂ ᓇᓪᓕᑐᐃᓐᓇᖏᑦ ᓱᕐᕋᑕᐅᓯᒪᔪᓄᑦ ᖃᐅᔨᓴᕐᓂᐅᔪᑦ ᐱᓇᓱᐊᕐᑕᐅᓂᖏᑦ, ᐃᑉᐱᒋᓗᒋᑦ ᓄᓇᓕᓐᓂ ᐊᒻᒪᓗ ᓄᓇᓕᓕᒫᓂ ᐃᑲᔪᕐᓯᒍᑎᖏᑦ ᐊᒻᒪᓗ ᐃᓱᒫᓗᑎᖏᑦ ᐃᓱᒪᒋᔭᐅᖁᓪᓗᒋᑦ.

You can access relevant publications regarding this subject at: https://keac-ccek.org/en/briefs-and-position-papers/

ᓯᑕᒪᓂᑦ ᓱᕐᕋᑕᐅᒪᔪᓂᒃ ᖃᐅᔨᓴᕐᓂᖅ

ᓄᓇᕕᒻᒥ ᓄᓇᕕᒻᒥ, ᓯᑕᒪᐅᓕᕐᑐᑦ ᖃᐅᔨᓴᕐᓃᑦ ᐊᑐᓕᕐᑎᑕᐅᔪᑦᓴᐅᓂᐊᕐᑐᑦ ᐱᔭᑦᓴᓂᒃ ᐱᕙᓪᓕᐊᔪᓕᕆᓂᕐᒧᑦ:

1. ᑯᐯᒥ ᐱᕙᓪᓕᐊᑎᑦᓯᓂᖅ JBNQA-ᑯᑎᒍᑦ;
2. ᑲᓇᑕᒥ ᐱᕙᓪᓕᐊᑎᑦᓯᓂᖅ JBNQA-ᑯᑎᒍᑦ;
3. ᑲᓇᑕᒥ ᐱᕙᓪᓕᐊᑎᑦᓯᓂᖅ ᓱᕐᕋᑕᐅᒪᔪᓂᒃ ᖃᐅᔨᓴᕐᓂᒧᑦ ᐸᕐᓇᓯᒪᐅᑎᑎᒍᑦ;
4. ᐱᕙᓪᓕᐊᑎᑦᓯᓂᖅ ᓄᓇᕕᒻᒥᐅᑦ ᓄᓇᒥ ᑎᒍᒥᐊᒍᓐᓇᐅᑎᑎᒍᑦ (NILCA).

**Interactive map coming soon

ᓱᕐᕋᑕᐅᒪᔪᓂᒃ ᖃᐅᔨᓴᕐᓂᖅ ᐱᕙᓪᓕᐊᑎᑦᓯᓃᑦ ᖃᓕᕇᑦᑐᓂᒃ ᐱᔪᓐᓇᓂᖃᕕᒋᔭᐅᔪᑦ ᓄᓇᕕᒻᒥ

ᐃᒪᕐᐱᖏᓂᒃ ᓄᓇᕕᒻᒥ ᐃᓄᖏᑦ ᐱᒍᓐᓇᐅᑎᓂᒃ ᐊᒻᒪᓗ ᑲᒪᒋᐊᖃᕐᓂᖏᑦ ᐊᕕᖃᑎᖃᓲᑦ ᑯᔩᒃᑯᓂᒃ ᐊᒻᒪᓗ ᐃᓄᖏᓐᓂᒃ ᓄᓇᕘᒥ, ᓯᑕᒪᑦ ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓇᓯᒪᐅᑏᑦ ᐊᒻᒪᓗ ᓱᕐᕋᑕᐅᓂᖏᓐᓄᑦ ᖃᐅᔨᓴᕐᑏᑦ ᑎᒥᐅᔪᑦ ᓄᐃᑕᐅᓯᒪᔪᑦ NILCA-ᒃᑯᓄᑦ ᐱᓇᓱᐊᓂᐊᕐᑎᓗᒋᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᔪᓂᒃ. ᑲᑐᑦᔨᔭᐅᔪᓂᒃ ᐃᒪᕐᐱᒥ ᖃᓕᕇᑦᑐᓂᒃ ᐱᒍᒪᔭᐅᔪᓂᒃ, ᓄᓇᕕᐅᑉ ᑕᕆᐅᖁᑎᖓᓂᒃ ᐸᕐᓀᑏᑦ ᐃᑦᓯᕙᔨᖏᑦ (NMRPC) (https://nmrpc.ca/) ᐊᒻᒪᓗ ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᒪᖔᑦ ᕿᒥᕐᕈᔩᑦ ᑲᑎᒪᔨᖏᑦ (NMRIRB) (https://www.nmrirb.ca/) ᐊᑦᔨᒌᒥᒃ ᐱᓇᓱᐊᕐᑐᑦ ᐊᒻᒪᓗ ᐱᓇᓱᐊᖃᑎᖃᕐᓱᑎᒃ ᑯᔩᒃᑯᓂᒃ, ᑯᔩᒃᑯᑦ ᑕᕆᐅᖁᑎᖓᓂ ᐸᕐᓃᑏᑦ ᐃᑦᓯᕙᔨᖏᑦ ᐊᒻᒪᓗ ᑯᔩᒃᑯᑦ ᑕᕆᐅᖓ ᓱᕐᕋᑕᐅᓕᒪᖔᑦ ᕿᒥᕐᕈᔩᑦ ᑲᑎᒪᔨᖏᑦ. ᐊᕙᑎᖏᓐᓂ ᐊᑦᔨᒌᒥᒃ ᐊᑐᕐᓂᖏᓐᓂ ᐊᒻᒪᓗ ᐃᓐᓄᐃᓯᒪᓂᖏᓐᓂ, NMRPC ᐊᒻᒪᓗ NMRIRB ᐱᓇᓱᐊᖃᑎᖏᑦ ᐃᓄᖏᓐᓄᑦ ᓄᓇᕘᒥ ᓄᓇᕘᒥ ᐸᕐᓀᓂᕐᒧᑦ ᑲᑎᒪᔨᖏᑦ ᐊᒻᒪᓗ ᓄᓇᕗᑦ ᓱᕐᕋᑕᐅᓂᕐᒧᑦ ᕿᒥᕐᕈᔨᖏᑦᑕ ᑲᑎᒪᔨᖏᑦ.

ᐊᒥᓱᐃᑦ ᖃᐅᔨᓴᕐᑕᐅᓂᐊᕐᑐᑦ

KEAC-ᑯᑦ ᐃᓲᒫᓗᑦᑐᑦ, ᐃᓚᖏᑦ ᐱᔭᑦᓭᑦ ᐱᕙᓪᓕᐊᔪᑦᓴᑦ ᓄᓇᕕᒻᒥ, ᓯᑕᒪᑦ ᓱᕐᕋᑕᐅᒪᐅᔪᓂᒃ ᖃᐅᔨᓴᕐᓂᓄᑦ ᐱᕙᓪᓕᐊᑎᑕᐅᔪᑦᓴᐅᓂᐊᕈᓇᐅᒻᒪᑕ. KEAC-ᑯᑦ ᕿᒥᕐᕈᐸᑦᓱᑎᒃ ᐊᑐᓕᕐᑎᑕᐅᔪᓂᒃ ᑕᒪᒃᑯᓄᖓ ᐱᕙᓪᓕᔭᐅᔪᑦᓴᓄᑦ ᑎᒥᐅᔪᑦ ᐊᐅᓚᑕᖏᓐᓄᑦ ᐊᒻᒪᓗ, ᐊᕐᕌᒍᑦ ᐊᒥᓲᓕᕐᑐᑦ, ᐊᑐᐃᓐᓇᐅᕐᑎᓯᕙᑦᑐᑦ ᑐᓴᐅᒪᑎᑦᓯᒍᑎᓂᒃ ᑕᒪᒃᑯᓄᖓ:

• ᐊᓪᓚᓯᒪᔪᕐᑕᓕᒃ – ᐊᕙᑎᓂᒃ ᖃᐅᔨᓴᕐᓂᒧᑦ ᐊᑑᑎᔭᐅᒍᓐᓇᑐᖅ ᐅᔭᕋᓐᓂᐊᑎᓄᑦ (Hopes Advance iron mining project) (ᕖᕗᐊᕆ 2016)
• ᑐᓴᕐᑎᓯᒍᑎ – ᐅᖓᑖᓄᕐᓂᖓ ᐊᕙᑎᒥᒃ ᖃᐅᔨᓴᕐᓂᒧᑦ ᓄᓇᕕᒻᒥ (ᒫᑦᓯ 2002)

2017-ᒥ KEAC ᐋᕐᕿᓱᐃᓯᒪᕗᑦ ᖃᐅᔨᒋᐊᕐᕕᐅᒍᓐᓇᑐᓂᒃ ᒪᓕᒐᕐᓂᒃ ᐊᕙᑎᓕᕆᓂᕐᒨᓕᖓᔪᓂᒃ ᐃᓅᖃᑎᒌᑦ ᓱᕐᕋᑕᐅᓂᖓᓄᑦ ᖃᐅᔨᓴᕐᓂᒧᑦ ᒪᓕᑦᑕᐅᒋᐊᓕᓐᓂᒃ ᐊᑐᕐᑕᐅᔪᑦᓴᓂᒃ ᓄᓇᕕᒻᒥ. ᑐᑭᓯᓇᑦᓯᐊᓱᑎᒃ ᐅᖄᔪᓂᒃ ᐊᑐᓂ ᓯᑕᒪᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᕐᒧᑦ ᒪᓕᑦᑕᐅᔪᑦᓴᓂᒃ ᐊᑐᕐᑕᐅᒍᓐᓇᑐᓂᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᐊᕐᑕᐅᔪᓄᑦ ᓄᓇᕕᒻᒥ, ᑕᑯᓐᓇᓂᖃᓗᐊᖕᖑᐊᓱᑎᒃ ᐃᓄᓕᒫᑦ ᐃᓚᐅᓂᖏᓐᓂᒃ. ᐊᑐᓂ ᐊᑐᕐᑕᐅᔪᑦᓭᑦ, ᓀᑦᑐᒥᒃ ᓱᓇᐅᓂᖓᓂᒃ, ᑲᔪᓯᕙᓪᓕᐊᓂᕐᒧᑦ ᓄᐃᑕᑎᑦᓯᔪᓂᒃ ᐊᒻᒪᓗ ᑐᑭᓯᓇᕐᑎᓯᔪᓂᒃ ᐊᑐᕐᑕᐅᕙᓪᓕᐊᔪᓂᒃ ᐊᓪᓚᓯᒪᔪᑦ ᐱᑕᖃᕐᑎᑕᐅᔪᑦ, ᐊᒻᒪᓗ ᖃᐅᔨᒋᐊᕐᕕᐅᒍᓐᓇᑐᑦ ᐱᓇᓱᐊᕐᑐᓄᑦ ᕿᒥᕐᕈᔨᐅᓂᕐᒧᑦ ᑎᒥᐅᔪᓄᑦ.

ᒪᓕᒐᖅ ᓄᑕᐅᓯᓕᕐᑕᐅᔪᕕᓂᖅ 2019-ᒥ, ᑭᓯᐊᓂ ᑌᒪᖕᖓᓂᑦ ᑲᕙᒪᑐᖃᒃᑯᑦ ᒪᓕᒐᖕᖑᑎᑦᓯᔪᕕᓃᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᕐᒧᑦ ᒪᓕᒐᕐᒥᒃ. ᐃᓘᓐᓈᒍᑦ ᑐᓴᐅᒪᑎᑦᓯᒍᑎᖓ ᐱᑦᔪᑎᖃᕐᓱᑎᒃ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᕐᒥᒃ ᓄᓇᕕᒻᒥ ᐊᒻᒪᓗ ᐱᓇᓱᐊᕐᑕᐅᒍᑎᖏᑦ JBNQA ᐊᒻᒪᓗ NILCA ᐊᑖᒍᑦ ᓱᓕᖏᓐᓇᕋᓗᐊᕐᓱᑎᒃ, ᐊᕕᑦᑐᓯᒪᔪᖅ IAA-ᒨᓕᖓᔪᖅ ᐋᕐᕿᒋᐊᕐᑕᐅᒋᐊᖃᓛᕐᑐᖅ ᐱᐅᓂᕐᓴᒥᒃ ᑭᒡᒐᑐᖁᓪᓗᒍ 2024-ᒥ ᐋᕐᕿᒋᐊᕐᑕᐅᓯᒪᔪᓂᒃ ᖃᕙᒪᑐᖃᒃᑯᑦ ᒪᓕᒐᖏᓐᓂᒃ.

ᓄᓇᕕᒻᒥᐅᑎᒍᑦ ᐱᓇᓱᖃᑎᒌᕝᕕᖓᑕ ᑲᑎᒪᕕᖓ

2020-ᒥ, ᑭᒡᒐᑐᕐᑎᖏᑦ KEAC, ᒪᑭᕝᕕᒃ ᐊᒻᒪᓗ ᓇᔅᑳᐱᒃᑯᑦ Kawawachikamach-ᒃᑯᑦ ᐋᕐᖀᔪᕕᓃᑦ ᐱᓇᓱᐊᖃᑎᒌᑦᑐᓂᒃ (WG) ᕿᒥᕐᕈᓚᖓᑎᓪᓗᒋᑦ ᐊᑐᓕᕐᑎᑕᐅᔪᓂᒃ 2019 ᖃᕙᒪᑐᖃᒃᑯᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᖓᓄᑦ ᒪᓕᒐᕐᒥᒃ (IAA) ᐊᒻᒪᓗ ᑲᒪᒋᔭᖃᕐᓗᑎᒃ ᐊᒥᓱᖕᖑᑎᑕᐅᓂᖓᓂᒃ ᐊᕙᑎᓕᕆᓂᕐᒧᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᕐᒧᑦ ᐱᓇᓱᐊᕐᑕᐅᒍᑎᖏᑦ ᐊᑐᕐᑕᐅᔪᑦ ᓄᓇᕕᒻᒥ, ᐊᖏᖃᑎᒌᒍᑎᓂᒃ-ᑐᖕᖓᕕᓕᒃ ᐊᕙᑎᓕᕆᓂᕐᒧᑦ ᖃᐅᔨᓴᕐᓃᑦ ᓄᐃᑕᓕᕇᕐᑐᑦ JNBQA-ᑎᒍᑦ, ᑯᐯᒃ ᑕᕐᕋᖓᑕ ᑲᓇᓐᓇᖓᓂ ᐊᖏᖃᑎᒌᒍᑎ (NEQA) ᐊᒻᒪᓗ NILCA.

ᓯᕗᓪᓕᐹᖑᓗᓂ ᐊᓂᒍᕐᑕᐅᔪᕕᓂᖅ, ᓅᕕᒻᐱᕆ 2020-ᒥ, WG ᐊᓪᓚᒋᐊᖕᖓᑐᕕᓂᖅ ᑐᓴᕐᑎᓯᒍᑎᒥᒃ, ᐋᕐᕿᓱᐃᒍᑕᐅᔪᖅ ᐱᑦᔪᑕᐅᔪᓂᒃ ᖃᐅᔨᓴᕐᑕᐅᓯᐊᕆᐊᓕᓐᓄᑦ IAA-ᒥ ᓇᓗᓀᔩᓂᒃᑯᑦ ᐊᖏᖃᑎᒌᒍᑎᐅᑉ ᐱᓇᓱᐊᕈᑎᖏᓐᓂᒃ, ᐃᓱᒫᓗᑎᖃᕐᑐᑦ ᐃᓚᐅᖃᑕᐅᔪᑦ, ᐱᐅᓯᕆᔭᐅᖃᑦᑕᓯᒪᔪᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᖓᓄᑦ ᐊᑦᔨᒌᓕᕐᑎᓯᒐᓱᐊᕐᓂᐅᓯᒪᔪᑦ ᐊᒻᒪᓗ ᑭᖑᓂᖓᓂ ᑲᔪᓯᑦᓯᐊᓯᒪᓂᖓ ᐊᒻᒪᓗ ᐱᔭᕆᐊᑐᔫᓂᖓᑕ ᑕᑯᓐᓇᑕᐅᓂᖏᑦ. WG ᑌᒪ ᐱᓇᓱᐊᕐᑐᕕᓂᖅ ᖃᐅᔨᓴᕐᓂᒥᒃ ᐊᖏᖃᑎᒌᒍᑎᓄᑦ ᐱᓇᓱᐊᕐᑕᐅᒍᑎᖏᓐᓄᑦ ᐊᒻᒪᓗ ᓄᑖᖅ ᖃᕙᒪᑐᖃᒃᑯᑦ ᒪᓕᒐᖓ ᐊᒻᒪᓗ ᓱᓀᑦ ᐱᓇᓱᐊᕈᑏᑦ ᐊᑐᕐᑕᐅᒍᓐᓇᑐᑦ ᓴᐳᒻᒥᓂᕐᒧᑦ ᐊᐅᓚᑦᓯᖃᑎᒌᑦᓱᑎᒃ ᐱᒐᓱᐊᕐᑕᐅᔪᑦ ᓄᓇᕕᒻᒥ. WG ᓄᐃᑦᓯᓯᒪᔪᖅ ᑐᓴᕐᑎᓯᒍᑎᒥᒃ ᐁᕆᓕ 2022-ᒥ ᓄᐃᑦᓯᓯᒪᔪᓂᒃ ᖃᐅᔨᓴᕐᓂᒧᑦ ᐱᓇᓱᐊᕈᑕᐅᔪᓂᒃ, ᖃᐅᔨᓴᕐᑕᐅᓂᖓᓄᑦ ᐊᑦᔨᒌᓕᕐᑎᓯᒍᑏᑦ IAA-ᒥ ᐊᒻᒪᓗ ᐃᓱᒪᒋᔭᐅᓯᒪᔪᑦ ᓈᒻᒪᓂᕐᐸᐅᓂᕋᕐᑕᐅᓱᑎᒃ ᓄᓇᕕᒻᒧᑦ ᐊᒻᒪᓗ ᐃᒣᓗᕈᑎᐅᖁᔭᐅᔪᑦ ᐃᓚᒋᐊᕈᑎᖏᓐᓄᑦ ᐊᑦᔨᒌᓕᕐᑎᓯᓂᕐᒧᑦ ᑲᑐᑦᔨᖃᑎᒌᑦᓱᑎᒃ ᐱᒐᓱᐊᕐᓂᕆᔭᖏᑦ ᐃᑲᔪᕐᓯᓂᕐᒧᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᑕᐅᓂᖏᓐᓄᑦ ᐱᓇᓱᐊᕈᑎᖏᓐᓄᑦ.

ᐃᓱᒪᒋᑦᓱᒋᑦ ᐃᓄᓕᒫᑦ ᓱᕐᕋᑕᐅᒐᔭᕐᓂᖏᑦ

2017-ᒥ, KEAC-ᑯᑦ ᐱᒋᐊᕐᑎᓯᓚᐅᔪᑦ ᖃᐅᔨᓴᕐᑕᐅᖃᑦᑕᓚᖓᑎᓪᓗᒋᑦ ᐃᓄᓕᒫᑦ ᓱᕐᕋᑕᐅᒍᑎᒋᒍᓐᓇᑕᖏᑦ ᐱᓇᓱᐊᕐᑕᐅᒍᒪᔪᓄᑦ ᑖᒃᑯᓇᓂ ᓯᑕᒪᓂ ᐊᕙᑎᓕᕆᓂᕐᒧᑦ ᓇᐅᑦᓯᑐᕐᓂᐅᒋᐊᓖᑦ ᑐᖕᖓᕕᒋᓗᒋᑦ ᓄᓇᕕᒻᒥ ᐊᑑᑎᔭᐅᒍᒪᔪᓂᒃ. ᖃᓄᑎᒋᒃ ᐱᓇᓱᐊᕐᓂᐅᕙᑦᑐᐃᑦ ᐊᑦᔨᒌᖕᖏᓂᖃᕐᒪᖔᑕ ᖃᐅᔨᒍᓐᓇᖃᑦᑕᓂᐊᕋᑦᑕ, ᓇᓗᓀᖃᑦᑕᓗᒋᓪᓗ ᓲᖑᓂᕆᔭᐅᒍᓐᓇᑐᐃᑦ ᓴᖕᖐᓗᑕᐅᒍᓐᓇᑐᐃᓪᓗ ᐊᑐᓂ ᐱᓇᓱᐊᕐᓂᐅᒍᒪᔪᓄᑦ, ᐊᒻᒪᓗ ᐊᑐᐃᓐᓇᕈᑎᒍᑎᐅᖃᑦᑕᓗᑎᒃ ᐅᓐᓂᑑᑎᑦᓴᓂᒃ ᐊᖓᔪᕐᖃᐅᕕᓕᓐᓄᑦ ᐊᖏᕐᑎᐅᓱᑎᒃ ᐊᑐᓕᕐᑎᓯᔨᓄᑦ ᑕᒪᒃᑯᓂᖓ ᐱᓇᓱᐊᕐᑕᐅᒍᒪᔪᓂᒃ. KEAC-ᑯᑦ ᑎᓕᔨᓯᒪᖃᑦᑕᓚᖓᑎᓪᓗᒋᑦ Secrétariat international francophone pour l’évaluation environnementale (international francophone secretariat for environmental assessment, SIFÉE-ᑯᓐᓄᑦ) ᖃᐅᔨᓴᖃᑦᑕᓚᖓᑎᓪᓗᒋᑦ ᖃᓄᖅ ᐃᓄᓕᒫᑦ ᓱᕐᕋᑕᐅᓂᖃᕋᔭᕐᒪᖔᑕ ᑖᒃᑯᐊ ᓯᑕᒣᑦ ᐊᕙᑎᓕᕆᓂᕐᒨᓕᖓᔪᐃᑦ ᐊᑐᕐᑕᐅᖃᑦᑕᓚᖓᑐᐊᕐᐸᑕ ᓄᓇᕕᒻᒥ. ᑕᒪᑦᓱᒥᖓ ᐱᓇᓱᐊᕐᓂᖅ ᓄᐃᑦᓯᒍᑕᐅᖃᑦᑕᓚᖓᔪᓂᒃ ᐱᖓᓱᐃᓂᒃ ᐊᓪᓚᓯᒪᔪᓂᒃ: ᐃᓗᐃᑦᑐᓯᐊᓂᒃ ᖃᐅᔨᓴᕐᓂᖃᖃᑦᑕᓗᑎᒃ, ᑐᑭᓯᓇᑦᓯᐊᓗᑎᒃ ᐊᓪᓚᓯᒪᑎᓪᓗᒋᑦ ᓀᓪᓕᑎᕐᓯᒪᓗᑎᒃ ᐊᒻᒪᓗ ᖃᐅᔨᑎᑦᓯᒍᑎᖃᖃᑦᑕᓗᑎᒃ ᖃᐅᔨᔭᕕᓂᕐᒥᓂᒃ. ᖃᐅᔨᒪᔭᐅᒋᐊᓖᑦ ᖃᐅᔨᓴᕐᑐᓄᑦ ᖃᐅᔨᔭᐅᔪᕕᓃᑦ, ᐅᓐᓂᑑᑎᓕᐊᕕᓂᓪᓗ ᐊᒻᒪᓗ ᓇᐅᑦᓯᑐᕐᑕᐅᔪᕕᓃᑦ ᐊᓪᓚᑕᐅᓯᒪᑦᓯᐊᖃᑦᑕᑎᓪᓗᒋᑦ ᐱᓇᓱᐊᓪᓚᕆᑦᑐᕕᓂᕐᓄᑦ ᐊᒻᒪᓗ KEAC-ᑯᓄᑦ ᐊᑑᑎᓪᓚᕆᑦᑕᐅᓚᖓᖕᖏᑲᓗᐊᕐᐸᑕ ᐅᓐᓂᑑᑎᓕᐊᒍᓯᒪᔪᐃᑦ ᐊᓪᓚᑕᐅᒪᑦᓯᐊᖃᑦᑕᒥᑎᓪᓗᒋᑦ.