ᓴᓃᑦ ᐊᐅᓚᑕᐅᓂᖓ
ᐊᐅᓚᑦᓯᓂᖅ ᓴᓂᓐᓂᒃ ᐱᔭᑦᓴᓕᐸᐅᔮᓗᖅ ᓄᓇᕕᒻᒥ ᑭᓯᐊᓂ ᑕᒪᒃᑯᐊ ᑲᒪᒋᔭᐅᑦᓯᐊᕈᓐᓇᑐᑦ. ᐱᔭᑦᓴᐅᑉ ᐊᑐᓕᕐᑎᓯᒍᑎᖓ ᐊᒥᓱᓂᒃ ᑭᒡᒐᑐᐃᔨᒻᒪᕆᓕᒃ: ᑯᐯ ᑲᓇᑕᐅᓗ ᑲᕙᒪᖏᒃ, ᐊᒻᒪᓗ ᓄᓇᕕᒻᒥ ᓄᓇᓕᓐᓂᓗ ᑎᒥᐅᔪᖏᑦ ᓂᐅᕕᕐᑎᓯᔩᓗ (ᓂᐅᕕᕐᕖᑦ, ᐊᐅᓪᓚᑎᑦᓯᔩᑦ, ᓴᓇᒐᑦᓴᓂᒃ ᑲᒪᔩᑦ, ᑕᒪᒃᑯᐊᓚᑳᑦ.). ᓄᑕᐅᓯᓕᕐᑎᕆᓂᖅ ᐊᐅᓚᑦᓯᓂᕐᒥᒃ ᐊᓂᑦᓯᕕᓐᓂᑦ ᒪᓕᒐᓕᐅᕐᓂᑯᑦ ᐊᕙᑎᒧᑦ ᐱᐅᔪᑐᐃᓐᓇᐅᖏᑦᑐᖅ; ᐃᑲᔪᕐᓯᒍᓐᓇᒥᔪᑦ ᐃᓄᓐᓂᒃ ᑮᓇᐅᔭᓕᐅᓂᒃᑯᓗ. ᑐᑭᓯᒍᓐᓇᐅᑎᓂᒃ ᓄᐃᑦᓯᓱᑎᓗ ᓀᓪᓕᒋᐊᕈᓐᓇᑐᓂᒃ, ᐊᑐᕆᐊᓪᓚᒍᓐᓇᑕᓂᒃ, ᓴᓗᒻᒪᓴᕈᓐᑐᓂᒃ ᐊᒻᒪᓗ ᐅᑎᕐᑎᒍᓐᓇᑐᓂᒃ.
ᖃᒻᒥᖅ ᐊᑑᑎᔭᐅᓚᐅᔪᐃᑦ
- ᐃᓚᐅᔪᕕᓃᑦ FCSAP ᓄᓇᖃᕐᖄᓯᒪᔪᑦ ᖃᐅᔨᒪᔭᖏᑦᑕ ᐊᒻᒪᓗ ᖃᐅᔨᓴᕐᑐᓕᕆᓂᕐᒧᑦ ᑕᑯᓐᓇᓂᓕᓐᓄᑦ ᐱᓇᓱᖃᑎᒌᓄᑦ ᑲᑎᒪᓂᖓᓐᓄᑦ ᐅᐃᓂᐲᒃᒥ ᔭᓄᐊᕆ 2024-ᒥ.
- ᕿᒥᕐᕈᓂᓕᕕᓃᑦ ᐸᕐᓇᓯᒪᐅᑎᓂᒃ ᒥᑭᓕᒋᐊᕆᓂᕐᒧᑦ ᐊᒻᒪᓗ ᑲᒪᒋᔭᖃᕐᓂᒧᑦ ᐊᐅᓚᑦᓯᓂᕐᒧᑦ ᐃᓪᓓᒍᑎᑦᓴᔭᓂᒃ ᑯᐯᒻᒥ, 2024-2029 ᐊᒻᒪᓗ ᐃᓚᐅᔪᕕᓂᐅᑦᓱᑎᒃ ᑐᓴᕐᑎᓯᓂᕐᒧᑦ ᑲᑎᒪᓂᕐᒧᑦ ᑖᑦᓱᒧᖕᖓᓕᖓᔪᓂᒃ.
- ᖃᐅᔨᓴᕐᓗᒋᑦ ᑲᕙᒪᑐᖃᒃᑯᑦ ᐃᓪᓓᒍᑎᑦᓴᔭᓂᒃ ᐊᑕᐅᓯᕕᑦᓱᒋᑦ ᐊᑐᕐᑕᐅᓲᑦ ᐊᑐᕐᑕᐅᒋᐊᖃᕈᓐᓀᓂᖏᓐᓂᒃ ᐊᑐᓕᕐᑕᐅᑎᑦᓯᒪᒪᖔᑕ ᐊᒻᒪᓗ ᐋᕐᕿᒋᐊᕐᓯᒪᒻᒪᖔᑕ ᐅᕐᓱᐊᓗᖃᐅᑏᑦ ᐅᕐᓱᐊᓗᓕᕆᓂᕐᓄᓗ ᒪᓕᒐᐅᑎᔭᐅᔪᓂᒃ ᐊᑐᕐᑕᐅᑎᑦᓯᐊᕋᓗᐊᕐᒪᖔᑕ
- ᐅᖃᐅᓯᑦᓴᖃᕐᕕᐅᓯᒪᔪᑦ ᐃᑉᐱᒋᔭᖃᕋᓱᐊᕐᓂᑦ ᐊᑑᑎᔭᐅᒋᐊᓖᑦ ᒪᓕᑦᑕᐅᒋᐊᓖᑦ ᐱᑦᔪᑎᒋᑦᓱᒋᑦ ᐱᕙᓪᓕᐊᑎᑦᓯᒐᓱᐊᕐᓂᒧᑦ ᐊᑐᓕᕐᑎᑦᓯᓂᕐᒧᓗ ᐊᒻᒪᓗ ᑮᓇᐅᔭᑎᒍᑦ ᓴᐳᒻᒥᒋᐊᖃᕐᓂᒧᑦ ᑮᓇᐅᔦᕈᑎᐅᓯᒪᑦᓱᑎᒃ ᐅᑎᕐᑎᑕᐅᒍᑎᑦᓭᑦ ᐋᕐᕿᓱᕐᓯᒪᐅᑎᖏᑦ ᐱᑦᔪᑎᒋᑦᓱᒋᑦ ᓇᓪᓕᑳᕐᑕᐅᓯᒪᑦᓱᑎᒃ ᕿᒣᓐᓇᑕᐅᓂᑯᐃᑦ ᓄᐊᑕᐅᒋᖃᕐᓂᖏᓐᓄᑦ, ᑐᖕᖓᕕᒋᑦᓱᒋᑦ EPR-ᑯᑦ ᒪᓕᑦᑕᐅᖁᔭᖏᑦᑎᒍᑦ, ᐃᑯᓪᓚᐅᒥᑎᑦᓯᒐᓱᐊᕈᑕᐅᒻᒪᑕ ᐊᒻᒪᓗ ᐱᑦᓴᖑᕆᐊᓪᓚᖁᓇᕐᓱᑎᒃ
- ᐅᖃᐅᓯᑦᓴᖃᕐᕕᐅᓯᒪᒻᒥᔪᖅ 2022-2027 ᐊᕐᕌᒍᖏᓐᓂ ᖃᓄᕐᑑᕈᑎᑦᓭᑦ ᐸᕐᓇᓯᒪᐅᑎᖏᑦ ᓯᕐᒦᑦ ᓴᐳᒻᒥᔭᐅᒋᐊᖃᕐᓂᖏᓐᓄᑦ ᐊᒻᒪᓗ ᒪᓕᒐᑦᓴᓕᐅᒋᐊᖃᕐᓂᓄᑦ ᑲᒪᑦᓯᐊᕋᓱᐊᕐᓂᒧᑦ ᐊᒻᒪᓗ ᓱᒃᑯᓇᕐᑐᑕᑦᓯᔭᐅᓯᒪᔪᓂᒃ ᑲᒪᑦᓯᐊᕋᓱᐊᕈᑎᑦᓴᓂᒃ ᐱᐅᓯᐅᒥᑎᑦᓯᒐᓱᐊᕈᑎᑦᓴᓂᓪᓗ ᓄᓇᖓᑕ ᓯᕐᒥᖏᓐᓂᒃ ᐊᒻᒪᓗ ᐃᑉᐱᒋᑦᓭᓇᕋᓱᐊᕐᓗᒋᑦ ᓱᒃᑯᑌᓕᑎᑦᓯᒐᓱᐊᒧᑦ ᐸᕐᓇᓯᒪᐅᑎᓕᐅᕐᓯᒪᓗᒋᑦ ᓄᓇᖃᕐᖄᓯᒪᔪᐃᑦ, ᐅᑭᐅᕐᑕᑐᒥᐅᑦ ᐊᒻᒪᓗ ᑎᑭᑕᐅᑐᐃᓐᓇᑲᓪᓚᖃᔭᖕᖏᑐᐃᑦ ᓄᓇᓖᑦ.
- ᐃᓚᐅᕕᐅᓚᐅᔪᒻᒥᔪᑦ ᓄᓇᕕᒻᒥ ᑲᕐᖓᓂᓗᑯᓂᒃ ᑲᒪᒋᔭᖃᕋᓱᐊᕐᓱᑎᒃ ᐱᓇᓱᐊᖃᑎᒌᑦᑐᐃᑦ ᑎᓕᔭᐅᒪᓚᐅᔪᒻᒪᑕ ᑐᑭᓯᒪᑎᑦᓯᒐᓱᐊᕐᑎᐅᖁᔭᐅᑦᓱᑎᒃ ᓴᓗᒣᓪᓕᑎᕐᑕᐅᓯᒪᔪᐃᑦ ᖃᓄᑐᐃᓐᓇᖅ ᑲᒪᒋᔭᐅᒋᐊᖃᕐᒪᖔᑕ ᑲᒪᒋᔭᖃᖃᑎᐅᒋᐊᓕᓐᓂᒃ ᓄᓇᓕᓕᒫᓂ ᐊᒻᒪᓗ ᑲᕙᒪᒃᑯᓂ ᐱᓯᒪᔪᓂᒃ. ᐱᓇᓱᐊᖃᑎᒌᑦᑐᐃᑦ ᓇᓗᓀᕐᓯᓚᕆᓚᐅᔪᑦᓱᑎᒃ ᐱᓂᐊᕐᓂᓕᕆᐅᑎᐅᒋᐊᓕᓐᓂᒃ, ᐱᔭᕆᐊᑭᑦᑐᑐᐃᓐᓇᐅᖏᑦᑐᓂᓪᓗ ᐱᓇᓱᐊᕐᑕᐅᒋᐊᓕᓐᓂᒃ ᐊᒻᒪᓗ ᐋᕐᖀᒐᓱᐊᕈᑎᑦᓴᓂᒃ ᓴᓗᒣᑦᑐᓂᒃ ᑲᒪᖁᔭᐅᑦᓱᑎᒃ ᑌᒣᓚᐅᔪᒻᒪᑕ ᐃᓄᓕᒫᑦ ᖃᓄᐃᖕᖏᓯᐊᕆᐊᖃᕐᓂᖏᓐᓄᑦ ᐊᕙᑎᐅᓪᓗ ᓴᐳᒻᒥᔭᐅᑦᓯᐊᒋᐊᖃᕐᓂᖓᓄᑦ.
- ᐃᑉᐱᒋᑦᓯᐊᓗᒋᑦ ᐱᑦᓴᖑᒋᐊᓪᓚᕈᓐᓇᑐᐃᑦ ᓄᓇᒥᒃ ᓱᕐᕃᑐᐃᓐᓇᕆᐊᓖᑦ ᒪᓕᒐᓕᐅᕐᑕᐅᓯᒪᐅᑎᖏᑦ ᐱᑦᔪᑎᒋᓗᒋᑦ ᑮᓇᐅᔭᓕᐅᕋᓱᐊᕐᑏᑦ ᑲᒪᑦᓯᐊᕆᐊᖃᕐᒪᑕ ᕿᒣᓐᓇᑕᕕᓂᖏᑦ ᓱᕃᑐᐃᓐᓇᕆᐊᖃᕐᒪᑕ ᓄᓇᓂᒃ ᐊᒻᒪᓗ ᓱᒃᑯᐃᑐᐃᓐᓇᕆᐊᓕᓐᓂᒃ ᐱᑦᓴᓕᐅᕐᑏᑦ ᑲᒪᒋᔭᖃᒋᐊᖃᕐᒪᑕ ᓱᒃᑯᐃᔪᕕᓂᐅᑉᐸᑕ ᓂᐅᕐᕈᑎᒋᕙᑦᑕᖏᑦ.
- ᐃᑉᐱᒋᑦᓯᐊᓗᒋᑦ ᓴᓕᒣᓪᓕᑎᕐᑕᐅᓯᒪᔪᐃᑦ ᓄᓇᕕᒻᒥ ᕿᒣᓐᓇᑕᐅᓂᑯᐃᑦ ᐃᓚᒋᔭᐅᒻᒥᑎᓪᓗᒋᑦ ᐅᔭᕋᕐᓂᐊᑎᓄᑦ ᐱᑦᓴᓯᐅᕐᕕᐅᓯᒪᔪᐃᑦ ᐊᒻᒪᓗ ᐊᖁᐃᒪᕕᐅᓯᒪᔪᐃᑦ ᐅᔭᕋᕐᓂᐊᕋᑦᓴᓯᐅᕐᑐᓄᑦ, ᑲᕙᒪᑐᖃᒃᑯᑦ ᓄᓇᒋᓂᕋᕐᑕᖏᓐᓂ, ᑲᓇᑕᐅᓪᓗ ᕿᑎᖓᓂ ᕿᒣᓐᓇᑕᐅᖃᑦᑕᓂᑯᐃᑦ ᐊᖁᐃᒪᕖᑦ ᐊᑐᐊᒐᕐᖑᑕᐅᓯᒪᒻᒪᑕ ᓇᓃᒻᒪᖔᑕ Green Corner-ᑯᑦ ᐊᓪᓚᑕᕕᓂᖏᓐᓂ 128-ᖑᒍᑎᒋᓕᕐᑕᐃᑦ ᑕᕐᕋᓕᒃᑯᑦ ᐊᑐᐊᒐᓕᐊᕆᓯᒪᔭᖏᑦ ᑐᖕᖓᕕᒋᑦᓱᒋᑦ.
ᑕᑯᒋᐊᕈᓐᓇᑕᑎᑦ ᑐᓴᕐᑎᓯᐅᑎᓕᐊᖑᓯᒪᔪᑦ ᑕᒪᑐᒧᖓᓕᖓᔪᓄᑦ ᐅᕙᓂ: https://keac-ccek.org/en/briefs-and-position-papers/
ᒪᓕᒐᑦᓭᑦ ᑲᒪᑦᓯᐊᓂᕐᒧᑦ ᐱᐅᒡᒍᑏᑦ ᓄᓇᒧᑦ ᐊᑦᑕᓇᒍᓐᓇᑐᓂᒃ ᓄᓇᕕᒻᒥ
2016-ᒥ, KEAC-ᑯᑦ ᓄᐃᑦᓯᕆᐊᓪᓚᓚᐅᔪᑦ ᐱᖓᓱᓂᑦ ᒪᓕᒐᑦᓴᓂᒃ ᑐᓂᔭᓂᑦ ᑲᕙᒫᐱᓐᓄᑦ, ᑎᒥᐅᔪᓄᑦ, ᓂᐅᕕᕐᕕᓄᑦ ᐊᒻᒪᓗ ᐃᓄᓕᒫᓄᑦ ᐅᐸᑦᑕᐅᕕᓐᓄᑦ ᓄᓇᕕᒻᒥ ᖃᐅᔨᒪᐅᑎᓂᒃ ᐱᐅᒡᒍᕕᓃᑦ ᓄᓇᒧᑦ ᐊᑦᑕᓇᕐᑐᓂᒃ ᑲᒪᔨᑦᓯᐊᕆᐊᒥᒃ.
- ᒪᓕᒐᑦᓴᖅ No. 1: ᐱᐅᒡᒍᑎᕕᓃᑦ ᓄᓇᒧᑦ ᐊᑦᑕᓇᒍᓐᓇᑐᑦ ᑲᒪᕆᔭᐅᑦᓯᐊᕆᐊᖃᓂᖓᓄᑦ ᒪᓕᒐᑦᓴᖅ ᓄᓇᕕᒻᒥ ᑲᕙᒫᐱᓐᓄᓗ ᐊᒻᒪᓗ ᑎᒥᐅᔪᓄᑦ
- ᒪᓕᒐᑦᓴᖅ No. 2: ᐱᐅᒡᒍᑎᕕᓂᕐᓂᑦ ᓄᓇᒧᑦ ᐊᑦᑕᓇᒍᓐᓇᑐᑦ ᑲᒪᕆᔭᐅᑦᓯᐊᕆᐊᖃᕐᓂᖓᓄᑦ ᓄᓇᕕᒻᒥ ᐃᓄᓕᒫᖏᓐᓄᓗ
- ᒪᓕᒐᑦᓴᖅ No. 3: ᓄᓇᒧᑦ ᐱᐅᖕᖏᑐᖅ ᑯᕕᑉᐸᖅ ᑭᐅᑦᓴᐅᑎᒋᕆᐊᖃᕐᓂᒧᑦ ᐸᕐᓇᓯᒪᐅᑎ ᓄᓇᕕᒻᒥ ᑲᕙᒫᐱᖏᓐᓄᓗ ᑎᒥᐅᔪᖏᓐᓄᓗ
ᑐᓴᕋᑦᓴᑦ
BAPE ᑭᖑᓪᓕᐹᒥ ᑐᓴᕐᑎᓯᒍᑎᖓ ᒫᓐᓇᐅᔪᖅ ᖃᓄᐃᓕᖓᓂᖏᓐᓂᒃ ᐊᒻᒪᓗ ᐊᐅᓚᑦᓯᒍᑎᓂᒃ ᑭᖑᓪᓕᐹᒥ ᐃᒋᑕᐅᔪᑦᓴᓂᒃ, ᔭᓄᐊᕆ 2022
ᒫᑦᔨ 8, 2021-ᖑᑎᓪᓗᒍ ᑐᕐᖃᑕᕐᕕᖓ ᐊᕙᑎᓕᕆᓂᕐᒧᑦ ᐊᒻᒪᓗ ᓄᖑᑎᑦᓯᒐᓱᓐᓂᖅ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ (MELCC) ᑎᓕᓯᔪᕕᓃᑦ ᐊᓪᓚᕕᖓᓂᒃ ᐃᓄᓕᒫᓂᒃ ᑲᑎᒪᑎᑦᓯᓂᖅ ᐊᕙᑎᓕᕆᓂᕐᒧᑦ (BAPE) ᖃᐅᔨᓗᑎᒃ ᑯᐯᓕᒫᒥ ᖃᐅᔨᓴᕐᓂᒥᒃ ᐊᒻᒪᓗ ᖃᐅᔨᒋᐊᕐᕕᖃᕐᓂᒥᒃ ᖃᓄᐃᓕᖓᓂᖏᓐᓂᒃ ᐊᒻᒪᓗ ᐊᐅᓚᑕᐅᓂᖏᓐᓂᒃ ᑭᖑᓪᓕᐹᒥ ᐃᒋᑕᑦᓭᑦ. ᑖᓐᓇ ᑎᓕᓯᒍᑎ ᐃᓚᐅᑎᑦᓯᔪᖅ ᓄᓇᖏᓐᓂᒃ ᐅᖃᕐᑕᐅᔪᓂᒃ ᐊᕕᑦᑐᓯᒪᔫᑉ ᐊᑖᒍᑦ 23 ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᖓᓂ (JBNQA) ᐊᒻᒪᓗ ᐊᕕᑦᑐᓯᒪᔫᑉ 14 ᑕᕐᕋᖓᑕ ᐅᐊᓐᓂᖓᓂ ᑯᐯᒻᒥ ᐊᖏᖃᑎᒌᒍᑎ. ᐱᓇᓱᐊᕐᑕᖓᑕ ᓂᕈᐊᕐᑕᐅᓂᕐᓴᐅᓗᓂ ᐊᒻᒪᓗ ᐃᓕᑕᕆᔭᐅᓂᖃᕐᓱᓂ ᑲᑎᒪᕕᒃ ᑲᒪᒋᔭᖃᕐᑐᓄᑦ ᑲᕙᒪᓄᑦ ᓄᓇᖓᓂ ᐊᕕᑦᑐᓯᒪᔫᑉ ᐊᑖᒍᑦ 23 JBNQA-ᒥ, KEAC-ᑯᑦ ᐊᖏᕐᓯᒪᔪᑦ ᐋᕐᕿᓚᖓᓗᑎᒃ ᐊᑦᔨᐅᖏᑦᑐᒥᒃ ᑎᓕᔭᐅᓯᒪᔪᖅ ᐃᓚᐅᖃᑕᐅᓚᖓᓗᓂ ᓄᓇᕕᒻᒥ ᐱᓯᒪᓗᑎᒃ ᖃᐅᔨᒋᐊᕐᓂᒥ BAPE-ᑯᓪᓗ. ᐱᑦᔪᑎᒋᓗᒋᑦ ᑐᖕᖓᕕᖏᑦ ᐋᕐᕿᑕᐅᓯᒪᔪᑦ JBNQA ᐊᑖᒍᑦ, ᖃᐅᔨᒋᐊᕐᓂᖅ ᐊᑐᕐᑕᐅᔪᕕᓂᖅ ᔫᓂ 9-ᒥ ᐊᒻᒪᓗ 10-ᒥ, 2021-ᖑᑎᓪᓗᒍ ᑰᑦᔪᐊᒥ.
ᑖᒃᑯᓇᓂ ᐅᖄᖃᑎᒌᓐᓂᓂ ᐃᓚᐅᔪᑦ ᐅᖃᕐᓯᒪᔪᑦ ᐊᒥᓱᒐᓚᓐᓂᒃ ᐃᓱᒫᓗᑎᐅᓗᐊᖕᖑᐊᑐᓂᒃ ᓱᕐᕃᓂᐅᔪᑦ ᐃᑯᐊᓚᑦᓯᓂᕐᒧᑦ ᓄᓇᓕᓐᓂᒥᐅᓂᒃ ᐊᒻᒪᓗ ᐊᕙᑎᒥᒃ, ᑮᓇᐅᔭᖃᕐᑎᑕᐅᑦᓯᐊᖏᓐᓂᖏᑦ ᐃᒋᑕᑦᓴᓄᑦ ᐊᐅᓚᑕᐅᓂᖏᓐᓄᑦ, ᕿᒣᓐᓇᑕᐅᓯᒪᔪᑦ ᓄᓇᓕᐅᑉ ᓯᓚᑖᓃᑦᑐᑦ, ᒪᓕᒉᑦ ᐊᒻᒪᓗ ᐱᓇᓱᐊᕐᑕᐅᔪᑦ ᑕᕐᕋᒨᓕᖓᓕᕐᑎᓯᒪᔪᑦ, ᐃᒋᑦᓯᕖᑦ ᐊᖏᓂᖏᑦ ᐊᒻᒪᓗ ᑲᒪᒋᔭᐅᓂᖏᑦ, ᐊᒻᒪᓗ ᐱᒍᓐᓇᕕᖃᖕᖏᓂᖅ ᑐᓴᐅᒪᒍᑎᓂᒃ ᐊᒻᒪᓗ ᐃᑲᔪᕐᑕᐅᒍᑎᓂᒃ ᐃᓄᑦᑎᑐᑦ/ᖃᓪᓗᓈᑎᑐᑦ.
ᑐᓴᕐᑎᑕᐅᓂᖅ ᖃᐅᔨᒋᐊᕐᓂᒥ ᐃᑲᔪᕐᓯᒍᑎᓄᑦ BAPE ᑭᖑᓪᓕᐹᒥ ᑐᓴᕐᑎᓯᒍᑎᖏᓐᓄᑦ (ᐅᐃᒍᐃᑎᑐᑦ ᑭᓯᐊᓂ) ᓄᐃᑎᑕᐅᔪᕕᓂᖅ ᔭᓄᐊᕆ 2022-ᒥ. ᑐᓴᕐᑎᓯᒍᑎ ᓄᐃᑦᓯᔪᖅ ᖁᓕᓪᓗ ᐊᑕᐅᓯᕐᓗᓂᒃ ᐸᕐᓇᓯᒪᐅᑎᓂᒃ ᐱᓇᓱᐊᕈᑎᐅᓚᖓᔪᓂᒃ ᓯᕗᓕᕈᑕᐅᓚᖓᔪᓂᒃ ᑲᕙᒪᒃᑯᑦ ᑐᑭᑖᕈᑎᖏᓐᓂᒃ ᐱᑦᔪᑎᓕᓐᓂᒃ ᐃᒋᑕᑦᓭᑦ ᑲᒪᒋᔭᐅᓂᖏᓐᓂᒃ. ᐃᓚᒋᐊᕈᑕᐅᑎᓪᓗᒍ, ᒪᓕᒉᑦ #10 ᑕᑯᓐᓇᓂᓖᑦ ᖃᓂᖕᖏᑐᓂᒃ ᓄᓇᓂᒃ ᐊᒻᒪᓗ ᑐᑭᓯᓇᕐᑎᓯᑦᓱᑎᒃ ᓄᐊᑦᑐᑦ ᐱᐅᓕᓂᐊᒉᑦ ᑲᒪᒋᔭᐅᓂᖏᑦᑕ ᐱᓇᓱᐊᕐᑕᐅᒍᑎᑦᓴᖏᑦ ᐊᑐᓕᕐᑎᑕᐅᒋᐊᓖᑦ ᐊᑦᔨᓗᐊᕆᒍᓐᓇᑕᖓᓂᒃ ᑯᐯᓕᒫᒥ. ᑲᕙᒪᒃᑯᑦ ᐃᓱᒪᒋᔭᖃᕆᐊᖃᕐᒥᔪᑦ ᐃᓅᖃᑎᒌᑦ ᐊᒻᒪᓗ ᓄᓇᖓᑕ ᖃᓄᐃᑦᑑᓂᖏᓐᓂᒃ ᓄᐃᑕᔪᓂᒃ ᖃᓂᖕᖏᑐᓂ ᓄᓇᓂ ᐊᒻᒪᓗ ᑮᓇᐅᔭᖁᑎᖏᓐᓂᒃ ᐊᒻᒪᓗ ᐋᕐᕿᓱᐃᓗᑎᒃ ᐱᐅᓂᕐᐹᓂᒃ ᓄᐊᑦᑐᓂᒃ ᐱᐅᓕᓂᐊᒐᕐᓂᒃ ᑲᒪᒋᔭᐅᒍᑎᑦᓴᖏᑦᑕ ᐸᕐᓇᓯᒪᐅᑎᑦᓴᖏᓐᓂᒃ ᒪᓕᓪᓗᒋᑦ ᖃᓄᐃᓕᖓᓂᖏᑦ ᐊᑐᕆᐊᓪᓚᕈᓐᓇᑐᑦ ᐱᐅᓕᓂᐊᒉᑦ. ᓀᓪᓕᑎᕐᓯᒪᔪᖅ ᑐᓴᕐᑎᓯᒍᑎ ᐊᑐᐃᓐᓇᐅᒥᔪᖅ ᖃᓪᓗᓈᑎᑐᑦ.
ᐊᒻᒪᓗᒋᐊᓪᓚᖅ, ᒪᑉᐱᕋᖅ 11 BAPE ᑐᓴᕐᑎᓯᒍᑎᖓᓂ ᐱᑕᖃᕐᑎᓯᔪᖅ ᑐᓴᕐᑕᐅᒋᐊᓕᓐᓂᒃ ᐊᒻᒪᓗ ᐃᒣᓗᖁᔨᒍᑎᓂᒃ ᐱᑦᔪᑎᒋᑦᓱᒋᑦ ᖃᓄᐃᓕᖓᓂᖏᑦ ᐊᒻᒪᓗ ᑲᒪᒋᔭᐅᓂᖏᑦ ᑭᖑᓪᓕᐹᒥ ᐃᒋᑦᑕᑦᓭᑦ ᑯᐯᒻᒥ ᐊᖏᖃᑎᒌᒍᑕᐅᓯᒪᔪᓄᑦ ᓄᓇᓄᑦ, ᐃᓚᐅᑎᓪᓗᒋᑦ ᓄᓇᕕᒃ. ᑐᖕᖓᕕᖓᑕ ᐃᓱᓕᒍᑎᖓ ᑕᒃᑲᓂ ᒪᑉᐱᕋᕐᒥ ᓄᐃᑕᑎᑦᓯᔪᖅ ᐅᖃᐅᓯᑦᓴᕆᔭᐅᕙᓪᓗᑐᕕᓂᕐᓂᒃ BAPE-ᑯᓐᓂ ᑲᑎᒪᔨᖏᓐᓂ ᐊᒻᒪᓗ ᐊᑐᓂ ᓄᓇᖃᕐᖄᓯᒪᔪᑦ ᐅᕝᕙᓘᓐᓃᑦ ᓄᓇᓖᑦ ᐱᑦᔪᑎᖃᕐᓱᑎᒃ ᐱᐅᓯᐅᒥᑎᑦᓯᓂᕐᒧᑦ ᐃᒋᑕᑦᓭᑦ ᑲᒪᒋᔭᐅᒍᑎᖏᑦᑕ ᐋᕐᕿᓱᕐᓯᒪᓂᖏᓐᓂᒃ ᑖᒃᑯᓇᓂ ᓄᓇᓂ.