ᐸᕐᓇᓃᑦ ᐊᑐᕐᓃᓗ ᓄᓇᒥ

ᐃᓗᓕᖏᑦ

ᓱᕐᕋᑕᐅᕙᓪᓕᐊᑐᐃᓐᓇᑎᓪᓗᒋᑦ ᓯᓚᐅᑉ ᐊᓯᑦᔨᓂᖓᓄᑦ, ᓄᓇᕕᒃ ᐅᖁᒪᐃᑦᑐᒪᕆᒻᒥᖁᖅ ᐱᕙᓪᓕᐊᑕᐅᑎᓪᓗᒋᑦ ᓱᓇᑐᐃᓐᓇᐃᑦ ᐃᓄᖁᑎᖏᑦᑕ ᐅᓄᕐᓯᕙᓪᓕᐊᓂᖏᓐᓄᓗᐊᙳᐊᖅ, ᐃᓂᕐᕋᐅᑎᖃᕆᐊᖃᕐᓂᖏᓐᓄᑦ, ᓄᓇᖁᑎᖓᑕᓗ ᐱᑦᓴᖃᑦᓯᐊᓂᑯᖓᓄ ᐊᒻᒪᓗ ᐃᑯᒪᓕᐅᕈᑎᐅᑐᐃᓐᓇᕆᐊᓕᓐᓄᑦ ᑰᓐᓂᑦ. ᓱᕐᕋᑕᐅᓗᐊᖁᓇᒋᑦ ᑖᒃᑯᓄᖓ ᐱᓇᓱᐊᕐᓂᓄᑦ ᐅᓄᕐᓯᕙᓪᓕᐊᔪᓄᑦ ᓱᒃᑯᑕᐅᓪᓗᐊᖁᓇᒋᑦ ᓄᓇᖓ ᐊᒻᒪᓗ ᐃᓅᖃᑎᒌᓄᓕᖓᔪᑦ ᓄᓇᕕᐅᑉ ᓄᓇᓕᖏᓐᓂᑦ, ᖃᓄᐃᓗᕈᑎᑦᓴᓕᐊᕕᓃᑦ ᓄᓇᐅᑉ ᐊᑐᕐᑕᐅᓂᑦᓴᖏᓐᓄᓕᖓᔪᑦ ᐸᕐᓀᑕᐅᒪᔪᑦ ᓴᐳᑦᔭᐅᕗᑦ ᐊᒥᓱᒐᓚᓐᓄᑦ ᐅᑭᐅᕐᑕᑐᒥ ᑎᒥᐅᔪᓄᑦ.

ᖃᓄᐃᓕᖓᒐᓱᓐᓂᖏᑦ

ᑎᒥᐅᔪᖅ ᐃᑉᐱᒍᓱᒋᐊᓕᒃ ᕿᒥᕐᕈᓗᓂ ᐊᑐᕐᑕᐅᓯᐊᕋᓗᐊᕐᒪᖔᑕ ᐊᕕᑦᑐᓯᒪᔪᒥ 23ᒥ ᔭᐃᒻᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᓂ ᐊᖏᖃᑎᒌᒍᑎᖓᓂ, ᑕᐃᔭᐅᔪᖅ ’ᐊᕙᑎᒧᑦ ᓯᕗᓂᑦᑎᓂᓪᓗ ᐱᕙᓪᓕᐊᔭᐅᔪᑦᓴᐃᑦ ᐅᑭᐅᕐᑕᑐᒥ 55 ᐃᑰᑕᖓᓂ’, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓚᐅᒋᐊᖃᕐᖁᑦ ᓯᕗᓪᓕᐅᓗᑎᑦ ᑐᑭᓯᒋᐊᕐᕕᐅᖃᑦᑕᓗᑎᑦ ᑲᔪᓯᓕᕐᑎᑕᐅᓂᖏᓐᓂᑦ ᑲᕙᒪᐅᑉ ᐱᖁᔭᖏᑦ, ᒪᓕᒐᐃᑦ ᖃᓄᐃᓕᖓᒋᐊᕈᑎᖏᓪᓗ ᓱᕐᕃᔪᑦ ᓄᓇᖁᑎᖓᓂᒃ ᐃᓄᖃᑎᒌᓐᓂᑎᒍᓪᓗ ᐊᕙᑎᖏᑦ ᓄᓇᕕᒻᒥ. ᑲᒪᒋᔭᑦᓴᔭᐅᒐᓗᐊᕐᑎᓗᒍ ᓄᓇᓕᓕᒫᓄᓕᖓᔪᑦ ᐱᕙᓪᓕᐊᓂᕐᒧᓕᖓᔪᑦ ᐊᑐᐃᓐᓇᕈᕐᑎᑕᐅᔪᑦᓴᔭᐅᑦᓱᑎᑦ ᑯᐸᐃᒃ ᑲᕙᒪᖓᓄᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓯᒪᑦᓴᓯᐅᕐᑏᑦ ᑲᑎᒪᔨᖏᑦ ᐅᑉᐱᕆᔭᖃᕐᖁᑦ ᐱᒻᒪᕆᐅᒋᐊᖓ ᐱᓇᓱᖃᑎᒌᑦᓯᐊᓂᕐᓴᐅᒋᐊᖃᕐᓂᖏᓐᓂᑦ ᐅᑭᐅᕐᑕᑐᒥ ᑎᒥᐅᔪᐃᑦ ᐃᓚᐅᔪᑦ, ᑲᕙᒪᒥ ᐊᕕᑦᑐᓯᒪᔪᑦ ᐊᑦᔨᒌᖕᖏᑐᑦ ᐃᓚᐅᔪᑦ ᐊᒻᒪᓗ ᐃᓄᖁᑎᖏᑦ ᓄᐃᑦᓯᓂᐊᕐᒪᑕ ᓱᕐᕃᓗᐊᙱᑐᓂᑦ ᐱᕙᓪᓕᐊᑎᑦᓯᓂᕐᒥᒃ ᓄᓇᓕᓐᓂ ᓄᓇᖁᑎᓕᒫᖓᓂᓪᓗ.

ᐅᑭᐅᕐᑕᑐᒥ ᐊᑐᐃᓐᓇᕈᕐᑎᓂᖅ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑉᐱᒋᔭᖃᕐᓂᖁᑦ ᐱᕙᓪᓕᐊᓂᖓᓂᒃ ᐅᑭᐅᕐᑕᑐᒥ ᐊᑐᐃᓐᓇᕈᕐᑎᓂᕐᒥᒃ ᑯᐸᐃᒃ ᑲᕙᒪᖓ ᐱᒋᐊᓕᕐᓂᒪᑕ. ᐃᓱᒫᓗᑎᖃᕐᓱᑎᑦ ᓱᕐᕃᒍᑎᒋᒍᓐᓇᑕᖏᓐᓂᑦ ᐱᓇᓱᐊᕐᓂᐅᔪᑦ ᐅᑭᐅᕐᑕᑐᒥ ᐃᓄᖁᑎᖏᓐᓂᓗ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐱᒻᒪᕆᖁᑎᖃᕐᖁᑦ ᑐᑭᓯᔭᐅᓕᐊᒥᒋᐊᖃᕐᓂᖓᓂᒃ ᔭᐃᒻᔅ ᐯ ᐊᒻᒪᓗ ᑯᐸᐃᒃ ᑕᕐᕋᖓᓂ ᐊᖏᖃᑎᒌᒍᑎᖓ ᐊᒻᒪᓗ ᓱᓇᐃᑦ ᓂᕆᐅᒋᔭᐅᒋᐊᖃᕐᒪᖔᑕ ᑖᒃᑯᓄᖓ ᐃᓚᐅᔪᓄᑦ. ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓚᐅᓂᖏᑦ ᓱᕐᕋᑕᐅᓗᐊᕋᑎᒃ ᐱᕙᓪᓕᐊᑕᐅᒍᓐᓇᑐᓄᓕᖓᔪᑦ ᓱᒃᑯᑎᕐᑕᐅᒋᐊᖃᖕᖏᓂᖏᓐᓄᓗᓕᖓᔪᓄᑦ ᐱᓇᓱᐊᖃᑎᒌᑦᑐᓄᑦ ᐱᕕᑦᓴᖃᕐᑎᓯᓯᒪᕗᑦ ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᓐᓂᑦ ᐃᓚᐅᑎᑦᓯᓱᓂ ᐱᒋᐊᕐᓂᖓᓂ ᐅᖄᖃᑎᒌᓐᓂᐅᔪᓂᑦ ᖃᓄᐃᓕᖓᒐᓱᓐᓂᖏᓐᓄᑦ ᐊᕙᑎᐅᑉ ᓴᐳᒻᒥᔭᐅᒋᐊᖃᕐᓂᖓᓂᒃ, ᓱᒃᑯᑕᐅᒋᐊᖃᖕᖏᓂᖓᓂ ᓄᓇᐃᑦ ᐊᑦᔨᒌᖕᖏᑐᑦ ᐊᒻᒪᓗ ᓄᓇᐅᑉ ᖃᓄᐃᓕᖓᓂᖓ ᓄᐃᑕᑎᑕᐅᑎᒐᓱᐊᓪᓗᒍ.

– ᖃᓄᐃᓕᖓᒐᓱᓐᓂᖏᓐᓂᑦ ᐊᓪᓚᓯᒪᔪᖅ ᑲᕙᒪᐅᑉ ᑐᑭᑖᕈᑎᒋᓯᒪᔭᖓ ᓴᓂᕐᕙᐃᓂᑦᓴᖓ 50 ᐳᓴᓐᑦᓗᐊᖓᓂᒃ ᐊᑐᐃᓐᓇᕈᕐᑎᑕᐅᒪᔪᖅ ᐅᑭᐅᕐᑕᑐᒥ ᓄᓇᖁᑎᖏᓐᓂᑦ ᐊᕙᑎᖓᑕ ᓴᐳᒻᒥᔭᐅᓂᑦᓴᖓᓂ, ᑲᔪᓯᑎᓗᒋᑦ ᐊᑦᔨᒌᖕᖏᓂᖏᑦ, ᓄᐃᑕᑎᓗᒋᑦ ᓄᓇᐅᑉ ᐱᐅᓯᑐᖃᖏᑦ ᐊᒻᒪᓗ ᐊᑦᔨᒌᖕᖏᑐᐃᑦ ᐱᕙᓪᓕᐊᑕᐅᒍᓐᓇᑐᑦ ᑐᖕᖓᕕᖃᖕᖏᓱᑎᑦ ᒪᑭᑕᒐᓱᐊᕈᑎᐅᔪᓂᑦ ᓄᐃᑕᐅᒐᔭᕐᑐᓂᑦ. (ᓄᕕᒻᐱᕆ 2011)

ᐊᑐᐃᓐᓇᕈᕐᑎᓂᖅ ᓄᓇᕕᒃ (ᐸᕐᓇᓯᒪᐅᑎᒃ)

ᑐᖕᖓᕕᖃᕐᓱᑎᑦ ᐃᓱᒫᓗᑎᖏᓐᓂᑦ ᐊᕙᑎᖓᓂ ᐃᓄᐃᓪᓗ ᐱᒍᓐᓇᕆᐊᓕᖏᑦ ᔭᐃᒻᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᓂ ᐊᖏᖃᑎᒌᒍᑎᒦᑦᑐᓂᑦ ᐃᓚᐅᒻᒥᑎᓪᓗᒋᑦ ᐱᖁᔭᐃᑦ ᒪᓕᒐᐃᓪᓗ ᐊᑐᕐᑎᑕᐸᐅᔮᓗᓂᖏᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᖃᐅᔨᒪᒐᓱᐃᓐᓇᖃᑦᑕᓯᒪᕗᑦ ᐱᓇᓱᖃᑎᒌᓐᓂᐅᔪᓂᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᒪᑭᕝᕕᒃ ᑯᐊᐳᕆᓴᓐᑯᓗ ᐊᑐᐃᓐᓇᕈᕐᑎᑕᐅᓂᖓᓂᒃ ᓄᓇᕕᒃ (ᐸᕐᓇᓯᒪᐅᑎᒃ) ᓄᐊᑦᓯᓯᒪᔪᑦ ᖃᐅᔨᒪᔭᐅᒋᐊᓕᓐᓂᑦ ᑕᐃᒃᑯᐊᑎᑐᑦ ᐊᕕᑦᑐᓯᒪᔪᐃᑦ ᑯᐸᐃᒃ ᑲᕙᒪᖓᓂ ᐊᑐᐃᓐᓇᕈᕐᑎᑕᐅᒪᔪᑦ ᐅᑭᐅᕐᑕᑐᒧᓕᖓᔪᑦ. ᑖᒃᑯᐊᓗ ᐱᓇᓱᐊᕐᑕᐅᔪᕕᓃᑦ ᓄᐃᑦᓯᓯᒪᒋᕗᑦ ᐱᕙᓪᓕᐊᓂᕐᒧᓕᖓᔪᓂᑦ ᐱᓇᓱᐊᕐᑕᐅᒐᔭᕐᑐᓂᑦ ᐊᕐᕌᒍᓂᑦ ᐊᕙᑎᓪᓗ ᑕᓪᓕᒪᓪᓗᓂᑦ ᐃᓄᐃᑦ ᐃᓗᕐᕈᓯᖓ ᓄᓇᒥᓗ ᐊᑐᕐᓂᕆᓱᖏᑦ ᐃᑉᐱᒋᑦᓱᒋᑦ.

ᐊᑐᐃᓐᓇᕈᕐᑎᓂᖅ ᓄᓇᐅᑉ ᐊᑐᕐᑕᐅᓂᑦᓴᖏᓐᓄᓕᖓᔪᓂᑦ ᑲᑎᕕᐅᑉ ᓄᓇᖁᑎᖓᓂ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐱᒻᒪᕆᐊᓗᖁᑎᖃᕐᖁᑦ ᐊᑐᐃᓐᓇᕈᕐᑎᑕᐅᒋᐊᖃᕐᓂᖓᓂᒃ ᓄᓇᐃᑦ ᐊᕕᑦᑐᑕᐅᓯᒪᒍᑎᖏᑦᑕ ᐱᖁᔮᐱᖏᓐᓂᑦ ᑐᖕᖓᕕᒋᔭᐅᓲᑦ ᐊᑦᔨᒌᖕᖏᑐᓂᑦ ᓄᓇᓂᑦ ᓄᓇᖁᑎᖓᓂ ᐅᓇᓗᑦᑕᐅᖅ ᐊᕙᑎᓕᕆᓂᕐᒧᑦ ᓄᓇᖁᑎᖓᑕᓗ ᓴᐳᒻᒥᔭᐅᒋᐊᖃᕐᓂᖓ, ᐱᓗᐊᕐᑐᒥᒃ ᓄᓇᓕᓐᓄᑦ ᖃᓂᑦᑐᐃᑦ. ᑕᑯᓐᓇᓗᒋᑦ ᐃᓪᓗᑖᕆᐊᓪᓚᕆᐊᖃᕐᓂᖓ ᓂᕆᐅᒋᔭᐅᔪᐃᓪᓗ ᐃᓪᓗᓕᐅᕐᓂᐅᒐᔭᕐᑐᐃᑦ ᓄᓇᕕᒻᒥ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᕿᒥᕐᕈᓯᒪᕗᑦ ᐊᑦᔨᒌᖕᖏᑐᓂᑦ ᐱᖁᔮᐱᓐᓂᑦ ᐊᑐᕐᑕᐅᒍᓐᓇᑐᓂᑦ ᑲᔪᓯᓕᕐᑎᓯᒍᑎᐅᒍᓐᓇᕋᔭᕐᑐᓂᑦ ᐊᑐᐃᓐᓇᕈᕐᑎᒍᑎᒃ ᓄᓇᐅᑉ ᐊᑐᕐᑕᐅᓂᑦᓴᖏᓐᓂᑦ ᑲᑎᕕᐅᑉ ᓄᓇᖁᑎᖓᓂ (1998). ᐃᑲᔪᕐᓯᓂᕐᖁᑦ ᖃᐅᔨᓴᕐᓂᒥᒃ ᓇᐅᖑᒻᒪᖔᑕ ᑐᓴᐅᒪᔭᐅᒋᐊᓖᑦ ᐱᖁᔮᐲᐅᒋᕐᑐᓂᑦ ᓄᓇᓕᓕᒫᓂᑦ ᐊᕕᑦᑐᓯᒪᔪᓂᑦ ᓄᓇᓕᐊᕈᕐᓂᑦ ᑯᐸᐃᒃ ᓯᕿᓂᖓᓃᑦᑐᓂᑦ ᐊᑐᕐᑕᐅᒍᓐᓇᒐᔭᕐᑐᓂᑦ ᓯᕗᓂᑦᑎᓂ ᐱᖁᔮᐱᐅᒐᔭᕐᑐᓂᑦ ᑲᑎᕕᐅᑉ ᓄᓇᖁᑎᖓᓂ.

ᐃᐱᕃᓐᓇᑕᐅᒪᔪᑦ ᓇᒻᒥᓂᓕᓐᓄᑦ ᒪᖃᐃᕝᕕᓂᑦ ᐊᓯᖏᓪᓗ ᒪᖃᐃᕝᕖᑦ

ᓇᓂᑐᐃᓐᓈᓱᑎᑦ ᓄᓇᕕᒻᒥ ᐊᒥᓲᕗᑦ ᓅᒍᓐᓇᑑᑦᓱᑎᑦ ᓅᒍᓐᓇᖏᑦᑐᐃᓗ ᒪᖃᐃᕝᕖᑦ. ᐃᓚᖏᑦ ᐊᖏᕐᑕᐅᒍᑎᖃᖕᖏᑐᑦ ᐅᕝᕙᓗᓐᓃᑦ ᐃᐱᕃᓐᓇᑕᐅᓯᒪᔪᑦ. ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐅᑉᐱᕆᔭᖃᕐᖁᑦ ᐱᒻᒪᕆᐊᓗᒋᐊᖓ ᓱᕐᖁᐃᓯᐊᕐᑕᐅᒋᐊᖃᕐᓂᖏᓐᓂᑦ ᑖᒃᑯᐊ ᒪᖃᐃᕝᕖᑦ ᐊᓪᓚᑕᐅᒪᒍᑎᓕᒫᖏᑦ ᕿᒥᕐᕈᔭᐅᓗᑎᑦ ᓈᒻᒪᓈᓯᐊᑐᒥᓗ ᓄᐃᑦᓯᓗᑎᑦ ᕿᒥᕐᕈᒍᓯᐅᒐᔭᕐᑐᒥᒃ.

ᐊᕐᖁᓯᐅᕐᓃᑦ

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓱᒫᓗᑎᖃᕐᖁᑦ ᐊᕐᖁᓯᐅᕐᓂᐅᒋᐊᓪᓚᑐᐃᓐᓇᕆᐊᓕᓐᓂᑦ ᓄᓇᖁᑎᖓᓂ ᓂᕆᐅᒋᔭᐅᔪᑦ ᐊᒥᓱᖕᖑᒋᐊᕐᓂᖏᑎᒍᑦ ᐱᕙᓪᓕᐊᓃᑦ ᐱᓇᓱᐊᕐᑕᐅᔪᑦ. ᑖᓐᓇ ᐱᑦᔪᑎᒋᑦᓱᒍ, ᖃᐅᔨᓴᕐᓂᖁᑦ ᐱᖁᔭᑎᒍᑦ ᖃᓄᐃᓕᖓᓂᖏᓐᓂᑦ ᐱᕙᓪᓕᐊᓂᕐᒧᓕᖓᔪᓂᑦ ᓄᓇᑎᒍᑦ ᐊᕐᖁᓯᐅᕐᓂᖃᕐᐸᑦ ᓄᓇᖁᑎᖓᓂ. ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᐃᓱᒪᒋᔭᖃᕐᖁᑦ ᐊᕐᖁᓯᐅᕐᓃᑦ ᐅᑭᐅᕐᑕᑐᒥ ᒪᓕᒐᖃᕆᐊᖃᕐᓂᖏᓐᓂᑦ ᐱᑦᔪᑎᒋᑦᓱᒍ ᒫᓐᓇᐅᑎᓪᓗᒍ ᒪᓕᑦᓯᐊᖏᒻᒪᑕ ᑐᖕᖓᕕᖏᓐᓂᑦ ᓱᕐᕃᓗᐊᕐᑕᐃᓕᓂᑎᒍᑦ ᐱᕙᓪᓕᐊᑎᑦᓯᓂᕐᓂᑦ.

– ᖃᓄᐃᓕᖓᒐᓱᓐᓂᖏᓐᓂᑦ ᐊᓪᓚᓯᒪᔪᖅ ᐱᑦᔪᑎᓕᒃ ᒫᓐᓇᐅᑎᓪᓗᒍ ᓯᕗᓂᑦᑎᓂᓗ ᐊᕐᖁᓯᐅᕐᓃᑦ ᓄᓇᕕᒻᒥ (ᐆᑦᑐᐱᕆ 2007)

ᑲᒪᒋᔭᖃᒋᐊᓪᓚᓱᑎᑦ 2007ᒥ ᖃᓄᐃᓕᖓᒐᓱᓐᓂᒥᒃ ᐊᓪᓚᑕᕕᓂᕐᒥᓂᒃ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑐᑦᓯᕋᒍᑎᖃᕐᓂᒥᔪᑦ ᑐᑭᓯᒋᐊᓪᓚᒍᑎᑦᓴᓂᑦ ᐱᕙᓪᓕᐊᑕᐅᔪᑦᓴᒥᒃ ᓄᓇᖁᑎᖓᓂ ᐃᓂᕐᕋᒍᑎᓄᓕᖓᔪᓂᑦ ᖃᓄᐃᓕᖓᒐᓱᓐᓂᐅᔪᓂᑦ ᑕᕐᕋᖓᓂ ᑯᐯᒃ.

ᓱᕐᕃᓗᐊᖕᖏᑐᓂᑦ ᓄᓇᒥᒃ ᐱᕙᓪᓕᐊᑎᑦᓯᓂᖅ

ᐃᓄᐃᑦ ᖃᐅᔨᓴᕐᕕᐅᑎᓪᓗᒋᑦ ᑯᐸᐃᒃᒥ ᓱᕐᕃᓂᖃᕐᓗᐊᕋᓂ ᐱᕙᓪᓕᐊᓂᕐᒧᓕᖓᔪᓂᑦ ᐊᑐᐃᓐᓇᕈᕐᑎᑕᕕᓂᕐᓂᑦ 2005ᒥ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐅᖃᕐᕕᖃᕐᓂᖁᑦ ᖃᓄᐃᓘᕈᓯᖏᓐᓄᓕᖓᔪᓂᑦ ᐅᓐᓂᑑᑎᐅᔪᕕᓂᕐᓂᑦ ᑐᕐᖃᑕᕐᕕᖓᓄᑦ ᐊᕙᑎᓕᕆᔨᒃᑯ ᑐᑭᓯᒪᖃᑎᒌᓐᓂᒧᓕᖓᔪᓂᑦ ᐊᓪᓚᓯᒪᔪᖁᑎᖏᓐᓂᑦ, ᖃᓄᐃᓘᕋᓱᓪᓚᕆᒍᑎᖏᑦ ᓄᐃᑕᕕᓃᑦ ᑲᕙᒪᐅᑉ ᐱᖁᔭᓕᐊᕆᒐᓱᑦᑕᖓᓂ, ᐅᓇᓗᑦᑕᐅᖅ ᑲᔪᓯᔪᒥᒃ ᓯᕗᓂᑦᑎᓂᓗ ᖃᓄᐃᓘᕈᑎᐅᒐᔭᕐᑐᐃᑦ ᐃᑲᔪᕐᓯᒐᔭᕐᑐᑦ ᓱᕐᕋᑕᐅᓪᓗᐊᕋᑎᒃ ᐱᕙᓪᓕᐊᓂᕐᒨᓕᖓᔪᑦ ᑯᐸᐃᒃᒥ.

– ᖃᓄᐃᓕᖓᒐᓱᓐᓂᖏᓐᓂᑦ ᐊᓪᓚᓯᒪᔪᖅ ᓱᕐᕃᓂᖃᓗᐊᕋᓂ ᐱᕙᓪᓕᐊᓃᑦ (ᕕᕈᐊᕆ 2005)