ᐃᒪᕐᓱᐃᑦ ᐊᒻᒪᓗ ᐃᒪᐃᑦ ᓄᓇᕕᒻᒥ ᑕᑯᑦᓴᐹᓘᓱᖑᕗᑦ ᓄᓇᕕᐅᑉ ᓄᓇᖁᑎᖓᓂ. ᑖᒃᑯᐊ ᖃᓄᐃᖕᖏᓯᐊᕐᓂᖏᑦ ᐃᓱᒫᓗᑎᐅᖏᓐᓇᓕᒫᕐᓲᖑᕗᑦ ᐱᑦᔪᑎᒋᑦᓱᒍ ᓱᕐᕃᓂᑯᖏᓐᓄᑦ ᓄᓇᖁᑎᖓᓂ ᓄᓇᓕᖏᓐᓄᑦ ᐃᒥᕐᑕᐅᒍᓐᓇᑐᒥᒃ ᐃᒪᕐᒥᒃ ᐃᒪᕐᑖᕕᐅᓱᖑᒻᒪᑕ ᐊᒻᒪᓗ ᐃᓪᓗᖃᑦᓯᐊᕆᐊᖃᕐᓂᒧᓕᖓᔪᓂᑦ. ᓄᓇᓖᑦ ᓄᓇᓕᕐᓚᖑᕙᓪᓕᐊᓂᖏᑦ ᐅᖁᒪᐃᓪᓕᐅᕈᑎᐅᒋᕗᑦ ᐱᑦᔪᑎᒋᑦᓱᒋᑦ ᑲᔪᓯᑦᓯᐊᑎᒐᓱᑦᓱᒋᑦ ᐱᐅᓯᐅᒥᑎᒐᓱᑦᓱᒋᑦ ᐱᒍᑦᔨᓂᐅᔪᐃᑦ ᐅᑭᐅᕐᑕᑐᒥ ᓄᓇᓕᖏᓐᓂᑦ.

ᑐᕌᒐᖓᓅᓕᖓᑦᓱᓂ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᕿᒥᕐᕈᓲᖑᕗᑦ ᖃᓄᐃᓕᖓᒋᐊᕈᑎᑦᓴᐅᔪᓂᑦ ᒪᓕᒐᕐᓂᓗ ᐃᒪᑦᓯᐊᖃᕐᓂᒧᓕᖓᔪᓂᑦ ᓄᓇᕕᒻᒥ ᐊᒻᒪᓗ ᐃᑲᔪᕐᓯᓱᓂ ᐅᑭᐅᕐᑕᑐᒥ ᓄᓇᓕᖏᓐᓂᑦ ᐱᓇᓱᖃᑎᖃᕐᓂᑎᒍᑦ ᐃᒥᕐᑕᐅᒍᓐᓇᑐᒥᒃ ᐃᒪᕐᒥᒃ ᐱᓇᓱᐊᕐᓂᐅᔪᓂᑦ.

ᐱᖁᔭᖅ 132 – ᐱᖁᔭᖅ ᐱᑦᔪᑎᓕᒃ ᓴᐳᒻᒥᔭᐅᓂᖏᓐᓂᑦ ᐃᒪᕐᓱᐃᑦ ᐃᒣᓪᓗ, ᐅᓐᓂᑑᑎᓕᒃ ᐊᓯᑦᔩᒋᐊᕐᓗᑎᑦ ᐱᖁᔭᑎᒍᑦ ᑐᖕᖓᕕᖏᓐᓂᑦ ᐊᑐᕐᑕᐅᔪᓂᑦ ᐃᒪᕐᓱᓄᑦ ᐃᒪᕐᓄᓗ ᓄᑕᐅᓯᓕᕆᒋᐊᕐᓗᑎᑦ ᖃᓄᐃᓘᕈᓯᐅᔪᓂᑦ ᓴᐳᒻᒥᔭᐅᑦᓯᐊᕈᑎᑦᓴᖏᓐᓂᑦ. ᕿᒥᕐᕈᒋᐊᓪᓚᕇᕐᓱᑎᑦ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐊᓪᓚᓂᕐᖁᑦ ᑲᒥᓯᓇᖓᓄᑦ ᐃᓂᕐᕋᒍᑎᓕᕆᓂᕐᒥᒃ ᐊᕙᑎᓕᕆᓂᕐᒧᓗ ᐅᖃᐅᓯᑦᓴᒥᓂᑦ.

ᕿᒥᕐᕈᔭᐅᓚᐅᑲᑦᑎᓗᒍ, ᓄᐃᑦᓯᒋᐊᖕᖓᐅᑎᒥᒃ ᒪᓕᒐᐅᑉ ᐊᓯᑦᔨᒋᐊᕐᑕᐅᒍᑎᑦᓴᖓᓂᒃ ᒪᓕᒐᕐᒥᒃ ᐃᒥᕐᑕᐅᒍᓐᓇᑐᒥᒃ ᐃᒪᑦᓯᐊᖃᕆᐊᖃᕐᓂᒧᓕᖓᔪᒥᒃ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᓱᒪᒋᔭᖃᕐᓂᖁᑦ ᐊᓯᑦᔨᒋᐊᕐᑕᐅᒍᑎᐅᖁᔭᕕᓃᑦ ᓄᓇᖁᑎᖓᓄᑦ ᐅᑭᐅᕐᑕᑐᒥ 55 ᐃᑰᑕᖓᑕ ᑕᕐᕋᖓᓄᓕᖓᔪᑦ ᐃᑲᔪᕐᓯᒐᔭᕐᑐᖁᑎᖏᑦ ᓄᓇᕕᒻᒥ. ᑭᓯᐊᓂ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐅᖃᐅᓯᑦᓴᖃᕐᕕᖃᕐᓂᖁᑦ ᐊᓯᑦᔨᒋᐊᕈᑎᐅᖁᔭᐅᔪᓂᑦ ᐃᓚᖏᓐᓂᑦ ᐱᑦᔪᑎᓕᓐᓂᑦ ᕿᒥᕐᕈᓂᐅᓲᓂᑦ, ᐊᐅᓪᓚᑎᑕᐅᓂᖏᑦ ᓴᓗᒻᒪᓴᐃᒍᑏᑦ ᐊᒻᒪᓗ ᐃᓕᓐᓂᐊᑎᑕᐅᓂᖏᓐᓄᓕᖓᔪᓂᑦ ᐅᑭᐅᕐᑕᑐᒥ ᐱᓇᓱᐊᕐᑎᐅᔪᓂᑦ.

ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᐃᑲᔪᕐᓯᒋᐊᓪᓛᖏᓐᓇᓂᕐᖁᑦ ᓄᓇᓕᓐᓂᑦ ᐃᒥᕐᑕᐅᒍᓐᓇᑐᒥᒃ ᐃᒪᑦᓯᐊᖃᕆᐊᖃᕐᓂᖏᓐᓂᑦ ᐊᓂᕐᕋᒋᔭᐅᔪᐃᑦ ᐃᒪᖃᐅᑎᖏᓐᓂᑦ ᓄᓇᕕᒻᒥ. ᑲᐃᓪᓗᑐᐃᓐᓂᖁᑦ ᐃᓪᓗᓕᕆᔨᕐᔪᐊᑯᖏᓐᓂᑦ ᑯᐸᐃᒃ (ᐃᓪᓗᓕᕆᔨᒃᑯ) ᐃᒪᑦᓯᐊᖃᕐᓂᑎᒍᑦ ᐃᒪᖃᐅᑎᖏᑦᑕᓗ ᓴᓗᒻᒪᓴᕐᑕᐅᓂᖏᑎᒍᑦ ᐃᑲᔪᕐᓯᔭᐅᒍᑎᒋᑦᓱᒋᑦ ᐃᓄᐃᑦ ᐃᓪᓗᖁᑎᖏᑦ.

ᐊᓪᓚᑕᕕᓂᖅ ᓴᓗᒻᒪᑦᓯᐊᑎᑕᐅᒋᐊᖃᕐᓂᖏᓐᓂᑦ ᐃᒪᑦᓯᐊᖃᕆᐊᖃᕐᓂᒧᑦ ᐃᒪᖃᐅᑎᖏᓐᓂ ᐃᑲᔪᕐᓯᔭᐅᒍᑎᒋᑦᓱᒋᑦ ᐃᓄᐃᑦ ᐃᓪᓗᖁᑎᖏᑦ. ᐱᓇᓱᖃᑎᖃᕐᓱᑎᑦ ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᖓᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᑲᑎᕕᒃ ᐊᕙᑎᓕᕆᓂᕐᒧᑦ ᐃᓱᒪᑦᓴᓯᐅᕐᑏᑦ ᑲᑎᒪᔨᖏᑦ ᑮᓇᐅᔭᖃᕐᑎᓯᓐᓂᖁᑦ ᐆᑦᑐᕋᐅᑎᐅᔪᒥᒃ ᖃᐅᔨᓴᕐᓂᐅᓱᓂ ᐃᓕᓐᓂᐊᕕᖓ ᐳᓕᑎᒃᓂᒃ ᒪᓐᑐᕆᐊᒥ. ᑕᓐᓇ ᐆᑦᑐᕋᐅᑎᐅᔪᖅ ᐱᓇᓱᐊᕐᑕᐅᔪᖅ ᖃᐅᔨᓴᕐᓂᖁᑦ ᐊᑦᔨᒌᖕᖏᑐᓂᑦ ᓴᓗᒻᒪᓴᐃᒍᓯᕐᓂᑦ ᐃᒥᕐᑕᐅᒍᓐᓇᑐᒥᒃ ᐃᒪᖃᐅᑎᓂᑦ ᐊᑦᔨᐸᓱᒋᔭᐅᔪᓂᑦ ᓄᓇᕕᒻᒥ ᐊᑐᕐᑕᐅᓲᓂᑦ.

ᐃᒪᖃᐅᑏᑦ ᓴᓗᒻᒪᓴᕐᑕᐅᓂᖏᑦ ᓄᓇᕕᒻᒥ: ᐆᑦᑐᕋᐅᑎᒃ ᖃᐅᔨᓴᕈᑎᒃ. ᑭᖑᓪᓕᐹᖑᑦᓱᓂ ᑐᑭᓯᓇᕐᑎᓯᒍᑎᒃ (ᔪᓚᐃ 2009)